迷魂鎖、鉸剪腳、倒頭樁……每個代名詞彷彿都給人暴力形象。其實這些都是誤解，因為真正的職業摔角絕不血腥，每個動作跟賽果都早已預定，那些激烈打鬥，只是選手的另類表演藝術。本地有一批摔角迷，就不惜尋名師學習，自費兼自度劇本，再放上網公諸同好，上演一幕幕正邪大戰的舞台劇，只是場地搬上擂台而已。
記者：劉明慧
攝影：伍慶泉、林栢鈞
巴黎鐵塔反轉再反轉
年紀輕輕的摔角教練阿麟說：「七十年代，何守信曾做摔角比賽節目主持，呢周星馳與張曼玉嗰招『巴黎鐵塔反轉再反轉』，就係出自何守信形容摔角招式嘅名稱。」會長Frankie補充：「其實香港好多電影、電視嘅武打場面都有抄摔角招數。」曾北上學藝的阿麟，最欣賞摔角的招式：「細個睇時覺得好刺激，後來才知道其實係夾招就更加欣賞。」因為欣賞，一班志同道合摔角迷便在兩年前自行組隊，成立首個正式註冊的香港職業摔角協會。
比踢波還安全
雖然職業摔角是打假波，但當你親身見到這班摔角迷作示範，個個身手靈活敏捷，表情十足，就明白為何觀眾睇得異常投入。阿麟表示喺美國早就當摔角為連續劇咁睇：「選手會有出場音樂，打前有晒故事情節，令觀眾睇得更投入；而且所有動作配合得好順好靚，根本就係藝術，比踢波更安全。」Frankie亦說：「你睇佢哋打假，其實背後落咗好多功夫，如果無番咁上下技巧、運動或武術底子，好多動作都做唔到㗎。」
搵贊助設摔角館
為了令摔角在香港發揚光大，協會會定期訓練新人，傳授摔角招數，最重要是讓新人習慣摔撻動作，學會被人撻時怎樣保護自己。現在每星期日，協會都會在體育館租場練習，又會定期搞比賽，可是香港沒有正規場地及設施，所以協會現時最希望能成立摔角館。阿麟說：「𠵱家喺政府體育館無辦法做到圍欄同繩索，所以好多高空摔撻技術都做唔到。」不過單是購買擂台及租用地方，絕對是大開支，所以協會正努力尋求贊助。「政府唔支持摔角呢類小眾運動，除非可以代表香港參加國際比賽攞到獎牌。所以我哋好想搵贊助，咁才可推廣這種運動。」
愛有型
阿賢（中學生）：摔角疑幻似真，在擂台摔角手才是最吸引。
B麟（中學生）：招式又靚又型，自己做到都覺得好有成功感。
阿樂（中學生）：動作又靚又型，不過被人摔撻就真係好痛。
4000年前已有記載
職業摔角，原來是由蒙古摔跤演變而成，摔跤早在大約4000年前於古希臘中已有記載，當時天神Zeus及Kronos為了擁有大地而在奧林匹克山上用摔跤去決鬥，現在奧運項目的摔跤就由此而來。而中國的摔跤，前蘇聯的桑勃，日本的柔道和相撲，以及古典式角力、自由式角力等均屬摔跤範疇。
輸贏有規則
雖然職業摔角七分假三分真，但始終做戲要做全套，所以亦有規則取勝。
1.把對手雙肩同時壓制在台上3秒。
2.對手在場外倒下，裁判數20秒前未能返回擂台。
3.對方被裁判取消資格。
4.以關節技讓對方投降。
5.對手在台上倒下，裁判數10秒前未能重新站起。
香港職業摔角協會
如果想欣賞本地摔角練習情況或有興趣加入，可到以下網址查詢，男女都歡迎！
會員收費：每月$100
網址： http://www.hkpwa.com