恒指喺中移動（941）同中資金融股帶動下，再升逾400點，專家認為，現時雖然處於熊市反彈，但對中資金融股未來走勢仍然樂觀。
黃：黃敏碩 李：李靄欣 楊：楊慧玲
楊：港股升勢持續，嚟緊恒指點睇？
黃：港股現時向下空間有限，23500至23800點嘅裂口位都守得住，加上市場情緒改變，對一啲壞消息唔會有太大反應，中資金融股嘅首季業績亦唔差，冇受到宏調同雪災影響，帶動中資金融股表現，但可惜係股市成交量仍然唔係好多。
李：短期亦睇好港股，近日都有輪商推出中資金融股窩輪，美中不足係除咗成交量唔多之外，好多散戶鍾情嘅中資金融窩輪，引伸波幅喺場外期權都跌得好急，所以就算投資者睇啱方向，亦賺得唔多。
楊：陸東啱啱降咗恒指嘅目標到26800點，離上望空間只有約2000點，現時買正股或窩輪博唔博得過？
黃：恒指合理可以上到26000點，現時港股係熊市反彈，投資者可以把握時間收復失地，做吓RangeTrading，捕捉波幅上落，但記住要控制注碼減風險。
李：無論炒正股或窩輪都要控制注碼，要搵啲有明顯支持嘅股票，好似國壽（2628）喺28至33蚊就有支持。
楊：咁嚟緊中資金融股可以睇好邊隻？
黃：較鍾意工行（1398）同建行（939），可以受惠兩稅合併。
李：噚日工行同建行窩輪嘅資金淨流入唔少，工行衝破咗6蚊，有機會上番6.5蚊。
買長實等月底減息
黃小姐：睇好長實（001），喺120蚊入咗，目標價睇130蚊，諗住炒月底美國減息效應。
楊：呢排本地藍籌地產股表現偏軟，走勢冇中資金融股咁好，應該點睇？
黃：短期地產股走勢都係弱啲，長實嘅表現就會係中性，家陣地產股嘅走勢未必會跑贏大市，建議等長實上番啲先走，換馬買中資金融股，回報會更好。
李：近期都係中資金融股跑先，下一浸有機會輪到資源股發力，其實佢哋呢輪嘅表現一啲都唔差，只不過係中資金融股表現太突出，至於地產股嘅炒作消息就稍為欠奉，嚟嚟去去都係炒減息，已經炒咗好耐冇新意。投資者寧買當頭起，所以應該買中資金融股，唔排除當中資金融股炒到升無可升時，先會到地產股。
--旺角黃小姐建議--
買入價：120元 目標價：130元
止蝕價：115元 時期：一個月