AV女優用身體挑起男人的情慾，脫得坦然。亞視節目《AV事務所》主持樊亦敏，當年因病險變禿頭，要戴假髮示人，為免出洋相，要揀節目做，是非不絕，她謂：「你估我唔想做遊戲節目呀？跳落泳池『咚』一聲成個蘑菇浮上嚟點算？」說得坦然，勇氣不比AV女優小。
轉投亞視的樊亦敏劇接劇，還擔任主持，包括剖析日本AV男女優百態的《AV事務所》，她為此勤刨AV做功課。女人看女人，有何感覺？樊亦敏說：「一啲都唔好笑，唔知睇緊乜嘢，冇趣味，淨係覺得佢哋好有想像力，同埋體力勞動好大。」
脫髮遭奚落
樊亦敏訪問過多位女優，印象最深刻首推吉沢明步，她說：「我問佢，如果將來拍拖，會唔會同個男仔講佢嘅經歷，佢話：『我唔會隱瞞，但好多男仔聽到之後都會退縮、或者係佢屋企人接受唔到，有啲人會睇唔起我，或者到最後會冇埋段感情。』佢當時眼濕濕，仲話：『我最唔鍾意人哋話我好慘，我只係做自己鍾意做嘅事。』」
吉沢明步說得坦然，樊亦敏談起自己的病情一樣磊落，當年她因免疫系統問題嚴重脫髮，要戴假髮，幸災樂禍者眾：「當時有個女藝人同我講：『我噚晚發夢見到你，甩晒頭髮，好得人驚呀！』我就安慰佢：『唔使驚，睇睇吓就習慣喇！』又有個男藝員同我講：『你個假髮咁怪嘅？有套要搵個光頭嘅女主角，不如你去試吓啦！』」
無綫待樊亦敏不俗，讓她用私人化妝間，又准她揀job做，因而惹人「眼紅」：「啲人覺得我一定同阿sir（邵逸夫）有路啦，你估我唔想做旅遊節目去廸士尼坐過山車咩？坐坐吓甩咗個假髮遮住後面嗰個塊面點算？你估我唔想做遊戲節目呀？跳落泳池『咚』一聲成個蘑菇（指假髮）浮上嚟點算？」
病癒覓愛人
當年醫生跟樊亦敏說「冇得醫」，惟有不斷為她在頭頂注射類固醇，高峯期每月打針數百支。樊亦敏決轉戰內地，捱了近十年，擁一定知名度，病亦已痊癒，至於感情生活，她甜笑謂：「有人肯煮飯畀我食囉。」
採訪：吳佩思
攝影：陳順禎
場地：Hone