何韻詩近日剛忙完她的「七日鮮」Hall1C店舖，賺了逾10萬元，她前晚亮相《蘋果》網站直播節目《娛樂開CHAT》，與讀者網上對談，她披露了未來音樂發展路向，希望可以培育一些有潛質的幕前幕後音樂人。雖然阿詩身邊有不少同性密友，但讀者還是很關心她將來的生育大計，問到她會否物色外籍人士與她生BB，阿詩即說：「BradPitt（畢彼特）！」曾捲入淫照風暴中的陳文媛（BoBo），事發後一直未見露面，阿詩早前公開表示彼此有發短訊聯絡，但近日已沒聯絡了，阿詩說：「佢知道有朋友支持就得，呢個時候都想畀多啲空間佢。」大家可登入《蘋果》網站 http://ent.appledaily.com隨時重溫節目。 採訪：懷鈺 攝影：陳順禎
期待女性打扮 中環Ricky
Ricky：我好想問你，你嚟緊會唔會作啲女性啲嘅打扮？
何韻詩：𠵱家已經好女性化囉喎！
Ricky：唔係呢啲，係超女性化嘅打扮呀？
何韻詩：邊啲呀？着lace裙？
Ricky：過去有儲開你啲相，你留長頭髮同着裙，好靚女呀！
何韻詩：多謝，你都好靚女呀！
Ricky：遲啲會唔會再有機會同Sammi（鄭秀文）合作呀？
何韻詩：總有機會嘅，因為大家都同一間公司啦，希望可以搵到啲新嘢再同佢一齊做啦！
追尋發展空間 何文田CindyLam
Cindy：你開呢個Hall1CShop咁有生意頭腦，又可以娛樂到fans，又可以慶祝入咗東亞四周年。想問吓第時唔做歌手嘅話，會做商人或者其他職業？
何韻詩：商業頭腦我唔可以話我好好，始終係第一次開shop啦，商界就更複雜嘅，我只係用我嘅自家品牌開一間七日鮮嘅舖頭，日後，我幾想發展我GooMusic嘅品牌，始終作為一個歌手，希望可以有多一重發展，我可以培育一啲音樂人，幕前幕後都好，呢方面係我幾有興趣嘅。
盼與憶蓮合作 西九龍FungFung
FungFung：你好呀，阿詩，你其實有冇諗過嚟緊嘅碟會同其他歌手合作呀？
何韻詩：都總會有機會嘅，作為一個歌手，都希望會有唔同嘅火花，一個人其實會有限，如果有唔同人合作，就會有唔同嘅化學作用，我都期待下一次合作。
主持：咁心目中有冇人選呀？
何韻詩：其實有好多前輩都想合作，但我想唔代表人哋想㗎，例如林憶蓮啦，上次睇佢個騷，佢把聲簡直係零瑕疵，我好想喺佢身上攞到啲嘢，吸取到啲嘢。
版主：凌零發
