謝霆鋒、張栢芝同囝囝Lucas前晚10點幾喺泰國返港，大晒溫馨，結果令泰國同赤鱲角機場出現混亂。佢哋出閘時除咗有助手，仲有四名保安，栢芝抱到Lucas實一實，霆鋒就一手攬妻兒一手開路。原本出閘後行去停車場只需要幾分鐘，但喺推推撞撞下，卒之用咗10分鐘。
雖然情況混亂，兩公婆都忍唔住逗個仔玩。潮童Lucas仲細，見到咁嘅場面，難免有啲怯，佢喺泰國機場着住件厚外套，但落機後就除咗，露出白雪雪嘅手臂仔。
攝影師跌倒
現場有20幾個記者採訪，又有旅客睇熱鬧，無綫《娛樂直播》嘅攝影師企上高梯拍攝，點知俾人撞到跌落地，好彩冇乜事；又有個有線攝影師混亂中撞到外籍男人，畀佢個仔捉住要佢講sorry。幸福三口辛辛苦苦去到停車場，上保母車後直驅愛都大廈寓所，喺高速公路度架車開到120咪，但出市區後都好守法，冇衝燈違規。