本欄四月五日寫「波士頓飛波士頓」，見報後，搞到何萬森兄好唔得閒，接電話接到手軟，全部係佢啲朋友要對對，為「波士頓飛波士頓」提供下聯。一位司徒華嘅同學對森哥講：「波士頓飛波士頓，余伯樂會余伯樂。」余伯，姓余之阿伯也；樂會，高興，樂於會面也，余伯樂當然就係余伯樂本名啦。森哥傳真相告，要通知余伯樂一聲。
另一方面，「名采」編輯傳來近二十封電郵，亦有幾位提出「余伯樂見余伯樂」或「會余伯樂」嘅，其他下聯謹擇數則，睇吓余伯樂與各讀者認為點？
其（一）波士頓飛波士頓，人民路過人民路
其（二）波士頓飛波士頓，李鵬飛吻李鵬飛
其（三）波士頓飛波士頓，法蘭西遊法蘭西
其（四）波士頓飛波士頓，老黃瓜分老黃瓜
其（五）波士頓飛波士頓，百老匯聚百老匯
其（六）波士頓飛波士頓，小田急逛小田急（小田，黎小田同名同姓）
其（七）波士頓飛波士頓，皇后鎮壓皇后鎮（紐西蘭有Queenstown皇后鎮）。
其他因篇幅所限，逼於割愛。每次講親趣致對聯，必有大量回應，余伯樂話對聯要講究平仄格律工整，亦要求對仗甚工。故此好對聯不易求。譬如佢自己收過讀者上聯云：「古堡好敦倫，敦倫總是倫敦好」，便搞到佢諗咗好耐，最後諗出兩個答案，其一係「賽場宜典雅，典雅還稱雅典宜」，韻味差了一截。其二係「長堤難約妞，約妞緣何紐約難」。長堤對古堡，約妞對敦倫，唔錯嘞，但弊在「約妞」與「紐約」並非同字，妞（女仔）與紐不同，係一個瑕疵，余伯樂自覺遺憾。
唉，「敦倫總是倫敦好」，可講得係天衣無縫，好難對嘅，偶有靈感hit中，就話易對啫，坐定定喺度諗，會諗到頭爆，無謂勉強。譬如話有財經專欄作家原復生，跟住有一位方卓如，來源本是「圓」對「方」，復生（譚嗣同字復生）對卓如（梁啓超字卓如），乃一時靈感而已，並非一早故意夾定也。