啱啱過咗嘅周末真係忙到飛起，不過唔係為咗工作，而係忙於周圍走去影嗰啲新近投入服務嘅巴士！老實講，呢幾年因為工作越嚟越忙，加上車款無以前咁多，所以都好少喺假期特登走出去影相順便遊巴士河。但呢排嗰股影巴士心癮又湧番出嚟，原因好簡單，就係好耐無新巴士投入服務嘅新巴同港鐵巴士，早前訂購嘅新車終於出街載客，令我呢個「封塵巴士迷」終於有動力，約埋班Friend周圍影。
雖然呢啲新巴士無論喺外觀同車廂內裝，都同九巴早已投入服務嘅AlexanderDennisEnviro500好相似，唔同嘅係佢哋全部用符合EuroIV環保條例嘅引擎，喺數據上有低廢氣排放嘅好處外，身為乘客嘅我仲Feel到部車好好力㖭！或者你會話，點解我同班Friend會為咗呢啲新巴士而遊車河同影相？係，佢哋的確係同九巴嗰批好相似，但始終屬於唔同公司，淨係車身顏色配搭都各有不同，對於我哋呢班巴士迷嚟講已經好吸引。
雖然好多途人都好奇怪咁眼望望，但我覺得無所謂，事關嗰刻做緊嘅嘢都係為興趣，加上又無阻到人，自己開心咪得囉，係咪？
記者：丹尼斯