呢排雨季又嚟料，電單車友如我心都煩埋。不過好彩，咁嘅季節都一樣可以揸車返工唔會日曬雨淋、泊車又唔使錢、過海隧道費8蚊雞、仲要幾毫子油費行一公里！之前寶馬出過架C1、Benelli出過架Adiva有頂綿，而Piaggio又有架3轆羊MP3，但率先集齊一套到港嘅，就係呢架星月XY150國產變種羊。祖國貨無保證？人哋主要係外銷歐洲㗎！國產貨都可以又快又穩定嘅，例如劉翔。
文：嘴嚼爺
攝影：陳盛臣
Model：Fion
車照側彎照片
曾訪問過揸有頂雙轆羊嘅車友，佢哋都指，最論盡時候就係慢車或停車泊位時失平衡，因為車身一體化，加咗個高頂架車側少少都好重，梗係難平衡啦。經驗之談，搞到筆者開車前要唞啖大氣再拉直腰、紮穩馬，旁觀阿叔仲以為我要表演用喉嚨頂槍頭。
嗱，威水喇，原來呢部國產貨好容易平衡㗎咋，唔使心得，因為最重嘅引擎同油缸裝喺車底部份，片彎扭軚時，打側嘅只係車殼，就算慢車或停車時都唔會左搖右擺。
始終3個轆，起步、加速力比兩轆150羊稍遜，但已達上公路標準。代理說最高車速可達約100km/h，在鬧市中穿梭試車，最快只扭到70km/h，可能當日風和日麗，完全感覺唔到最擔心的風阻問題。
轉向方面，未敢如兩轆般瞓身，但卻比想像中靈活，輕側車身已經順暢入彎。到停車泊車喇，雖然佢多個轆，但車身闊度卻和一般大羊分別不大，見有3/4個位先入就最穩陣。
停車，唔使落側架大架，只要拉一拉泊車手掣，車身及車輪都會鎖定，唔會前後郁，亦唔會左右擺，慢慢坐穩先落車，絕無狼狽畫面。
超值收視率
雖然三個轆、車頂、水撥，全部都唔應該喺Scooter身上出現，不過，呢架就實現晒三個願望。可能加埋鮮橙車身，喺街兜咗幾個圈，發覺好多人望望貢，停燈位時尤甚。到泊低影靚相，有位阿叔好奇問價，筆者叫佢估吓，佢話10萬！當時我曾懷疑佢係車行派嚟做媒嘅，10萬係誇張咗，不過事實兩萬幾車價又的確係驚喜，只有國產貨先做到。
配套方面，好勁噃。指揮燈設喺兩邊側中，呢個設定真係好有貴價車感覺。錶板精緻，掣盒功能齊，仲有個私家車獨有嘅水撥噴水掣加個電水撥，真係少見多怪。可能因為有車頂罩住，所以坐上雙座位，感覺唔算好寬闊，前後座應該會幾親密，正！
而上揭式尾箱，可以放個袋加頂頭盔加車冚都有位剩，不過如果兩個都係大頭佛就爭啲啲。
最後，車身顏色有齊黑白銀紅橙任揀，兩萬幾蚊新車加上外形搶眼，真係幾吸引，不過最大心理關口都係「國產車」呢3個字。其實咁，我屋企部電視係國產，DVD機又係步步高，TouchWood用咗兩年都未壞過。
規格表
引擎：150cc四衝風冷單汽缸
缸徑×衝程：57.4×57.8mm
油缸容量：6公升
馬力：11ps/8,500rpm
傳動：CVT無段變速皮帶傳動
體積：2,160×650×1,800mm
座高：720mm
車重：156kg
查詢：中國星月（21421717）
