野仔本月中在九龍灣國際展貿中心,舉行兩場音樂會,成員少爺占、小胡以及Chris組成六年,並不是年年出碟開騷,原來此舉是為了令歌迷對野仔的作品充滿期待,一推出就買,果然好橋。
六年前少爺占與大學同學小胡有意組成樂隊,之後遇上band仔Chris,只相處了三日便組成野仔,少爺占笑言:「我同小胡識咗好耐,之後喺唱片公司見到阿Chris,佢本身係『壞碑唇』成員,之後佢求我哋同佢一齊玩,我見佢咁可憐咪同埋佢玩囉,橫掂樂隊都要有識音樂嘅人。」
給歌迷驚喜
野仔兩位成員對於少爺占又要返電台開咪,又要顧及艾粒(ILoveYouBoyz)的工作,他們從沒半句怨言,小胡說:「完全冇問題,佢哋想幾時開騷咪開囉,好似平時做訪問,因為我返office工,佢哋都會遷就我㗎。」
至於Chris則認為沒有年年出碟開騷是好事,他解釋:「一年畀你出三隻碟又點呀?做到個人都冇晒心機,反而慢慢做,隔一段長時間先出,啲歌迷先會覺得餓餓哋,到我哋一出碟,佢哋先會嗱嗱聲去買㗎嘛。」
農夫任嘉賓
按照他們的策略,野仔相隔兩年於本月18及19日,在九龍灣國際展貿中心舉行兩場「野仔畢業禮音樂會」,定必令野仔迷引頸以待,少爺占透露他們邀請了農夫、林一峰、好拍檔Donald以及幾位DJ同事,另外有一位神秘女嘉賓一起演出。
採訪:李珮洳