Blogpaper：<br>碳纖篋一隻手指的起

Blogpaper：
碳纖篋一隻手指的起

上星期去東京Shopping，帶定個吉篋去，都係畀航空公司捉到超重。為慳千元行李超重費，喺機場又要重新執篋。唔忿氣磅吓個篋，淨重都成6kg，已佔寄艙重量的三成。問題不能不解決，超重的運費分分鐘夠買多件衫，實在要搵個夠輕夠硬的新篋。尋尋覓覓，最後都係選中了篋界一哥碳纖篋。

攝影︰譚盈傑
模特兒︰Queenie

http://appleblogpaper.blogspot.com

aboutme:Hallowina

超級饞嘴，相信幸福是吃一隻帶海水鹹味的肥美生蠔，滿腦都充滿美味食物，曾想過為好味的海鮮而移民澳洲，不過怕曬所以放棄。偏偏食量與身形不成正比，經常被人勸食多，實情係每日以優質食糧「餵飼」，胃部容量深不可測，可比黑洞。

輕得出奇軟得離奇

曾聽朋友W提過Rimowa係全世界最輕嘅篋，問CEODieter究竟有幾輕？「我講個數字你聽，其實都無意思。」隨即以一隻食指勾住手把，將成個篋的起。「我哋花好多時間研究製作碳纖物料技術，將鋁、鎂兩種原料混合，堅硬之餘又夠輕身。」人人以為碳纖如金屬般硬，他卻一手再將半邊篋捲埋，以示彈性十足。嚇得我目瞪口呆，看似金屬嘅碳纖可以如此柔韌。追問Dieter有無研發更輕的材料？「目前未有新idea，而呢隻碳纖由Rimowa研製，𠵱家係世界上最輕嘅篋。要再輕啲真係好難，不過會繼續努力！」總經理Charles話︰「飛機嘅窗都係用碳纖造，可想而知幾堅硬。」睇Rimowa最新廣告話個篋由飛機跌落地都唔爛，係咪真係做過測試先？「雖然無真係掟落街，不過個篋試過放入一個大型滾筒度，攪足十幾個圈，最後都係完好無缺。」掟極唔爛，咁講法咪一世唔使換篋？「我自己個篋都用咗7、8年，真係唔使換。不過就會追款，買多幾個唔同Size。有時因應出Trip時間嘅長短，都會拎唔同款。」咁屋企都要有好多位放篋喎。

■CEODieter經常出差，係用篋專家。最慘一次的經歷唔係爆篋，而係於Newark機場遺失行李。

■2008年新出的ChocolateBrown系列，Dieter親自示範用一隻食指便將這款行李篋拎起。（由$3,280至$3,980）

直間坑紋變標記

去完旅行就會盡快清篋收埋，屋企咁細，怎可能擺幾款篋喺屋企輪住用。Charles︰「因為有時去十幾日Trip會帶多幾件衫，用Tango可以放晒啲衫喺兩邊，拉上拉鏈。趕時間真係行李都唔使pack，好似一個衣櫃，打直開都拎到衫出嚟，非常方便。」我見一般篋都係用鋁鎖開關，但Rimowa有款係用拉鏈鎖，好似唔多安全。「如果冬天去旅行帶得衫多，都會用拉鏈篋，因為彈性高，可以帶多幾件，而且篋身輕30%。不過BusinessTrip多文件又有電腦，我都會用番較受力嘅鋁鎖，確係安全啲。」雖然篋的內櫳同細位都有好多唔同設計，但外形就劃一直條坑紋，只係配襯唔同顏色，唔怕悶咩？Dieter︰「篋嘅款式趨向實而不華，營造一個Professional嘅感覺，所以刻意保留呢個Design，變成品牌嘅標誌，等人一見到呢啲坑紋就諗到Rimowa。」Rimowa越賣越紅，今個星期就於澳門威尼斯人再開店，相當架勢。

■Charles家中最舊的Rimowa篋已經用上7、8年。

■Aluminum金色行李篋是最多fans的系列，好多人成Set買返去。（由$4,980至$7,380）

難仿製身價高

朋友講Rimowa初時，我真係唔識，但佢一講MaggieQ喺《虎膽龍威4》拎住嗰個公事篋，我就即刻有印象。Charles︰「除電影鍾意搵Rimowa客串，好多明星都係Fans。好似濱崎步成隊Crew都係用Rimowa，另外梁朝偉、黃秋生、Twins都係用Rimowa。篋界地位等同LV，堅持所有篋歐洲生產，絕對唔會中國製，突顯高貴身份，品質保證。」Rimowa越來越紅，搞到坊間都出唔少仿冒品。「好難冒嘅！我哋啲碳纖物料好專業，一拎上手就可以分到。𠵱家都有生產商開始用碳纖，不過我哋有秘密Formula，唔係咁易抄到。」買咗後去台灣第一次試用，人人都望住我個篋，Check-in時仲有地勤主動幫我貼個Fragile貼紙，那份虛榮感令我肯定冇揀錯它。

■以往Aluminum系列只有金、銀兩色，因為上色過程複雜，而這隻銅色是最新出品。（由$4,380至$8,880）

■Rimowa除行李篋外，亦有防水、防霉的相機盒，是專業攝影師的至愛。（由$3,080至$3,380）

Blogpaper：碳纖篋一隻手指的起

Blogpaper：
碳纖篋一隻手指的起