關淑怡和劉美君同於本月開騷，兩人近日拚命宣傳博見報，日前劉美君表示讓嘉賓草蜢和林海峰任摸任揸，前晚關淑怡演出《勁歌金曲》也不執輸，穿上名牌靚衫tubetop性感上陣，更凸點搶鏡，再加一幕在台上當眾仆倒，這回合關淑怡比劉美君先勝一仗！
兩位八十年代歌后關淑怡和劉美君，今個月先後於紅館開騷，她們近日相繼現身谷個唱，日前劉美君綵排時聲言會讓嘉賓草蜢和林海峰任摸任揸，前晚關淑怡在無綫電視廣播城演出《勁歌金曲》，罕有地換上兩套MaisonMartinMargiela靚衫，大騷身材。
雙膝跪地狼狽
關淑怡先穿上一套灰色蝙蝠外套襯白色tubetop，相當性感，之後她換上一套黑、肉色貼身裝，不過錄影時卻不慎凸點，起初工作人員不以為意，但當發現她凸點後，即把鏡頭拉遠或只拍大頭，避免凸點重現鏡頭。
關淑怡演唱歌曲《山水》，腳踏厚底鞋的她唱完想轉身離開時，卻被工作人員叫停，此時她一不留神便應聲仆倒，雙膝跪地，在旁的胡蓓蔚即上前扶起她，她尷尬地說：「sorry，唔好意思，跌親。各位記者，你哋唔好登，珍藏好啦！」事後關淑怡表示沒有受傷，還自我安慰：「跌得幾靚！唔關對鞋同個台事，係原本我諗住走，但俾人叫低，我就失重心跌低。」記者笑言這是缺陷美，她說：「都好彩，演唱會前有新聞，有嘢寫啦！」
當晚同場還有爸爸級歌手李克勤和任賢齊，克勤表示兩人甫見面即大談湊仔經，他說：「最明白大家心情，做完嘢想即刻返屋企，最唔開心係要做嘢返唔到屋企，囝囝認唔到自己。」對於張茜小產，小齊謂明白張衞健心情，他說：「我個BB都係早產，希望張茜平安，心情會好番。」
採訪：楊潔雯攝影：陳順禎
一網講盡 網友：又怪又老土
前晚關淑怡亮相《勁歌金曲》，先後換上兩套性感裝束示人，被不少網友批評她不倫不類。
幸運之神：着衫又怪又老土，搞得好睇都話吖，核突當有型，恐怖當時興。
babykuku：睇咗第一件白色衫已經嚇到關咗電視，𠵱家猶有餘悸。
100506：簡直嚇死人，着到勁sell身材，可惜又冇身材，總之就好老土！
資料來源：香港討論