4月份係日本遊戲廠商結算後嘅新一季度開始，加埋嗰邊適逢啱啱開學，以往習慣上都係三四線作品出爐之時，稍為有啲叫座力嘅作品都唔會揀呢個檔期。但當任天堂靠NDS成功重奪Game界霸主地位，佢冇再介意啲勁Game放喺幾時出，只要有Gimmick有實力反而仲做到一枝獨秀效果，更何況係全球引頸以待嘅Wii版《孖寶賽車》（MarioKart）？單憑支援全球車手一齊LinkPlay，已經唔使講嘢唔玩唔得啦！
文：陳福榮
全球連線齊挑機
話就話有幾個Mode畀你揀，但唔計自閉玩單打外，我諗絕大部份機主都會同朋友聯誼啩？始終NDS嗰集已經穩佔最佳同Friend打交道嘅正Game頭幾位，到咗Wii情況一定唔會有例外。佢嘅單機對戰模式，可以任你同1至3個朋友比拼，亦即係話如果4打嘅話，畫面就會Cut做一開四咁縮細晒，玩起嚟可能會冇咁好Feel。如果想同朋友甚至世界各地嘅車手決勝負，就可以接上網絡以WFC功能搵人搞比賽，據知分為世界規模、日本規模以及經由FriendList上搵對手；相信到時美版歐版一出，好多人都會聚晒喺世界規模賽事嗰度㗎啦！
洗心革面從頭再來
由超任開始，《孖寶賽車》已經近乎成為任天堂每代主機不可或缺嘅重頭大作，差唔多每集都好評如潮；但上次出喺GC嗰隻就整色整水，硬係加埋二人合作要素落去，結果反應遠不如之後NDS版咁萬人空巷。當然GC普及率完全唔可以同𠵱家Wii相提並論啦，因此開發人員痛定思痛，還原基本步變番正正常常咁純粹鬥速度，同埋鬥玩陰招賤嘢，結果未賣就已經掀起狂熱討論潮，睇怕機友們肯定又係晚晚怒煲「孖車」，其他Game等做炮灰㗎喇！
送軚盤考操控
由於Wii個遙控本身唔係設計嚟玩賽車，想做到恍如揸住堂軚嘅感覺，廠方於是隨Game附送一個軚盤，畀大家將個Wiimote塞入去模擬駕駛感覺，透過體感設計做到同揸真車分別唔大嘅效果。但好老實，「孖車」不嬲都係玩瘋狂刺激死衝爛衝，邊會同正正常常咁鬥快扯得上關係？仲有佢啲掟彎甩尾開Turbo嘅組合技，兼且如果使用電單車仲有埋抽頭等招式，要用堂軚做到都要花啲時間去掌握箇中秘訣。不過點都好過就咁拎住支棍嚟玩嘅，起碼冇咁易一嘢成支遙控飛咗出來咁大鑊。
角色道具多兼爽
同大多數老任遊戲一樣，「孖車」除咗鬍鬚仔Mario同細佬Luigi之外，基本登場角色仲包括菇仔、龜仔、桃公主、恐龍耀西、BabyMario、Baby公主、龜怪庫巴、大金剛同埋邪到出汗嘅華利奧及華路易。唔單止咁，除咗一般高卡車外，玩家仲可以揀電單車嚟玩，喺操控方面當然會有啲唔同，仲可以做出好多凌空花式，譬如越野車場等賽道最能夠發揮驚人效果。另外，拾取沿途道具係本系列致勝方針之一，以前大家用到熟晒嘅加速紅菇同蕉皮依然保留，仲新增震到周圍都郁晒嘅POW磚塊同監生狂電跑得較快對手嘅閃電雲，未到最後一刻都未必話贏梗！
買Game送軚盤
機種：Wii
廠商：任天堂
類型：RAC
人數：1-4人（網上2-12人）
日期：4月10日
售價：約$498（附軚盤）
查詢：I-Gamer（27253338）
