【本報訊】翱翔天際的航空機組人員，背後有被「賣豬仔」流落西非小國的辛酸故事。甘泉航空三月將其中一架客機連同機師及空中服務員出租給納米比亞航空公司，員工有如「行船」般飛越香港、倫敦、法蘭克福和納米比亞。甘泉突然清盤，最少28名機組人員，被迫滯留德國和非洲，部份員工出現胃痛、精神緊張等問題。
若有意外不知點算
「佢哋好大精神壓力，好擔心喺非洲一旦有意外點算！」鄧小姐的親屬是其中一名滯留海外的甘泉員工。她昨向本報表示，28名借調的機組人員，14人滯留德國，其餘14人在非洲。另一名甘泉職員黃小姐表示，在納米比亞難以上網，只能以手機短訊溝通。
機組的飛行路線迂迴，16日內要由香港飛倫敦到西非，再來回西非、法蘭克福，最後經倫敦返香港。立法會議員陳婉嫻昨陪同一名滯留員工家屬林女士到勞工處求助。林女士的21歲梁姓女兒，本月2日離港，原定本月18日返港。林女士昨與女兒通電話，女兒不知道公司已清盤。「阿女話大家都感到好徬徨，試過自費買機票返港，因為佢拎住工作簽證，唔可以就咁走，一定要由公司安排。」陳婉嫻指政府有責任盡快透過中國駐納米比亞大使館提供協助。