鬱金香貼出　田園風情

家居裝潢，有人要高科技，有人愛金碧輝煌，有人愛簡樸鄉土味。可能你覺得田園風有點娘，卻是最能讓人放鬆的家居環境。今次介紹的居屋，設計師將田園風融入家中，再加DIY家具，給人優雅閒適之感。

記者：區佩嫦
攝影：王文忠

唔一定用木家具

屋主Shirley其實是參加了CCTV舉辦的《交換空間》節目，與深圳另一家庭交換客廳，在室內設計師幫手下，用兩日時間，互相將對方客廳大變身。作為屋主，只要幫對方買吓傢俬、揼吓釘等就得，是個不錯的體驗。Shirley自己間屋，就以田園風為主題，其實田園味唔一定要用原木，她的客廳就以花作主題，木紋傢俬甚少出現。B&Q室內設計師CrystalChing認為：「Shirley鍾意花、植物，認為田園主題有relax感，加上有個兩歲囝囝，玩具雜物較多，必須將問題解決。」要有田園味，可加點原始味的家具擺設，Crystal把大廳兩堵牆髹上奶茶色，另一邊櫃則為Shirley最愛的香檳色。「奶茶唔會太深色，又帶泥土色調，比用綠色為佳。」

■鏡可作擺設外，更能將燈光反射。而降低天花線可遮着原來凸出的木線位。

沙磚砌櫃fit晒位

DIY是具原始味又適合香港的家居環境。「因客廳電視位較窄，好多電視櫃的尺寸都唔啱，於是我哋用沙磚和層板自製。砌完磚後仲要刮走磚與磚之間的沙，咁效果至會突出。」櫃底加上光管，能營造浪漫效果，而地櫃感覺無咁重，可增加空間感。
客廳以電視櫃為重點，飯廳則以高櫃為着眼點，Crystal將兩個白色高櫃背對背並排，再加腳吊高，用來貯存囝囝的雜物、玩具。「咁就唔怕客人一入屋見到雜物；櫃邊貼上大型鬱金香貼紙，更能突顯田園主題。用貼紙的好處是可以隨季節更換，唔怕被囝囝畫花，靈活性較高。」除高櫃外，Crystal將貯物櫃變成餐椅，收納又可切合主題。