退休高官喺私人機構特別吃香，除咗由於佢哋熟悉政府運作、官場人脈廣之外，其實佢哋本身都keep得好好㗎。好似警隊前一哥曾蔭培，退休後加入新創建（659），開始另一番事業，而且身形都仲保持得好fit，噚日佢出席新創建卓越大賞頒獎禮，向台下一眾員工講，年過60歲嘅佢，家陣可以做到60下掌上壓。
新創建噚日喺會展搞頒獎禮，獎賞旗下一眾體能好、工作表現佳，肯做義工貢獻社會嘅員工，雖則主席鄭家純冇到，但見副主席、彤叔女婿杜惠愷，同埋執董、彤叔外孫杜家駒在場，當然都聽到曾蔭培做60下掌上壓嘅威水嘢啦。華華見杜家駒30出頭，後生細仔，問佢做到幾多下掌上壓，點知佢笑笑口唔睬華華。果然60下掌上壓唔易做，可以鍊贏唔少後生仔！
杜家駒有四條A
杜家駒提神唔靠做運動，而係靠睇書，佢絕對係一個愛書之人，只係呢排公事繁忙，搞到冇時間睇。佢「咪」書有幾叻？睇佢當年ALevel讀理科，考四科就攞足四條A就知。
講開咪書佢唔只冇話唔睬華華，仲講唔停口，向今屆嘅會考生過兩招，話要考到好成績，秘訣係留心聽書，同埋做多啲PassPaper──乜口脗咁似啲狀元嘅！