華華近排同啲電訊界老友傾開，大家都話行頭靜英英，班老闆私務繁忙，有啲就掛住幫人出頭打官司，有啲就掛住讀書，前者唔好講係邊個嘞，後者就係城市電訊（1137）老闆王維基！
班老友話，喺中大讀緊EMBA嘅老王，今個月底畢業，但呢個唔係重點，重點係老王出埋錢畀五個下屬讀埋一份，其中四個每位畀28萬銀，當中城電CFO黎汝傑讀嘅最正，係堪稱全城最貴、收七十幾萬嘅科大EMBA，呢個老王津貼一部份！老友話，睇老王咁肯揼錢益下屬，8號仔班行家應該最感觸喎！
講開老王，正如佢話齋，公司上晒軌道，做好本份衝埋出香港就已經ok，如無必要都唔會同人開拖，就好似最近數記無啦啦踩過界，做埋固網，換轉以前？老王一早串爆人啦！
至於話數記個「家+電話」，老友話外形幾正，但𠵱家啲固網已經咁平（佢上星期見過8號仔啲街霸賣66蚊），大家諗唔通點解仲要畀嚿幾水數記賺囉！