華華最近睇上市公司年報，大部份管理層上年都有人工加，不過華置（127）就有啲唔同，大劉劉鑾雄上年做埋細劉嗰份，但份糧就冇加到，而且係04年開始未加過！
細劉劉鑾鴻06年尾因為滙漢控股內幕交易案，唔做得華置主席及執董，佢喺12月15日辭任，當時係華置CEO嘅大劉，咪孭埋主席個位囉，但睇番噚日出嘅07年年報，佢人工同上兩年一樣冇變。雖則過去三年都冇加人工，但佢始終係華置最高薪嘅管理層，呢個地位亦都冇變。
至於大劉仔劉鳴煒06年可以話係實習期，因為人工只得五萬五，平均每個月4583蚊，07年就唔同晒，佢喺阿叔細劉辭任嗰日被委任做執董，每年𢭃120萬港銀。不過加幅雖大，實際人工當然唔可以同老竇比啦，但跟同年紀嘅後生仔比好唔錯㗎嘞。
電郵：mailto:[email protected]