N年前嘅無記《城市追擊》同亞記《今日睇真D》，今年嘅亞記《師奶我最大》同無記《女人我最大》都證明一件事，模仿唔等於抄襲，係學習。香港史上俾人模仿得最多嘅，李小龍認第一，T字頭名牌紙巾可以認第二，報攤買到嘅甚麼Tango、Targo、Tamba，Tamba、Tinpo、Tomy……名，統統巧合地疑似，咁餡呢？
記者：梁雅焜
攝影：陳盛臣
功能上，紙巾本身係塊疑似手巾，存世目的係Perform手巾基本功能如擤鼻涕、抹汗、抹眼淚等等，人有三急去公廁，放低咗二両先發覺無廁紙，紙巾重要性就更加一紙抵萬金。做比較，要先知堅料Tempo有幾勁，真Tempo承托到25個五蚊銀，銀仔落紙巾睇得出有回彈力；要射172槍先爛，係，你無眼花，係172槍，何止濕咗比人堅韌多100%，直頭比其他疑似貨色堅韌多170幾個%啦，仲吸到10毫升水㖭。好，𠵱家即嚟三個簡單測試──
承托力：昔有肥姐踩雞蛋經典場面，今有距紙巾10厘米上方放五蚊銀，越托得多銀仔，越堅韌。
堅韌度：紙巾要掂水，亁爽嗰陣堅韌只係初步合格，要成為Thebest，硬捱水槍射擊，射濕都無穿無爛先至掂。
吸濕力：用針筒唧顏色水，睇紙巾吸到幾多毫升先開始滴漏水。
囗7days10包裝$6
簡評：第一代疑似T字頭名牌紙巾，N年前初登場未轉包裝最神似，最搞笑嘅係，𠵱家連佢自己本身都變成被模仿對象，市面曾經出現過7Rays、7Bays等兄弟蹤迹。承托力、堅韌度都好掂，吸濕力8隻之中最掂，難怪當年7days一面世，T字頭名牌紙巾緊張到要賣廣告轉Packing，因為佢Fight得起呀。
承托力（★★★★）：托到第24個五蚊銀都無事呀，掂。
堅韌度（★★★★★）：射到第70槍先撒手塵寰，比其他牌子勁好多。
吸濕力（★★★★★）：13毫升
囗Tango$1
簡評：跳完隻Tango用Tango抹汗掂唔掂？我答你，都OK掂。
承托力（★★★）：托到第10個五蚊銀先穿，表現唔錯。
堅韌度（★★）：射到第8槍開窿，濕水後堅韌程度一般啦。
吸濕力（★★★）：10毫升
囗Temba$1
簡評：包裝拙劣，字體歪歪斜斜，唔知想點。
承托力（★★★★）：托24個銀仔安然無恙，第25個開始裂嘞。
堅韌度（★★）：濕咗唔夠堅韌，射到第5槍就穿咗，可惜。
吸濕力（★★★）：10毫升
囗LamJin$1
簡評：又係樣似名唔似，不過個名同藍箭香口膠一模一樣
承托力（★★★★★）：Total托到25個五蚊銀，疑似Tempo一樣做得到。
堅韌度（★★）：可惜射到第5槍就穿咗，濕水後原形畢露喎。
吸濕力（★★★）：12毫升
囗Tampe$1
簡評：名有相似，物有相同，連包裝用色都抄得好神似。
承托力（★★）：托到第6個五蚊銀出現裂痕，亁身情況下已經咁弱雞。
堅韌度（★）：射3槍即穿，開大堅持用佢的話，小心一手都係呀。
吸濕力（★★）：9毫升
囗Mania$1
簡評：樣似名唔似，渣嘢。
承托力（★）：放2個五蚊銀即裂，8隻之中最水皮。
堅韌度（★★）：射到第7槍穿咗，只可以話，流眼水嗰陣都怕夠用嘅。
吸濕力（★★）：10毫升
囗維達$1
簡評：名唔似樣似，最搞鬼在於Tempo喺香港嘅紙巾業務已經喺上年俾維達收購，妹仔變咗主人婆。
承托力（★★★★★）：托24個五蚊銀。
堅韌度（★★★）：射到第20下先穿，已經好過晒大部份牌子。
吸濕力（★）：9毫升唔夠。
街訪
（左）Kun：「我用慣T字頭名牌紙巾，唔用其他牌子。」蔓儀：「雜嘜嚡過塊砂紙，搵鬼用咩？」
阿董：「我用開T字頭名牌紙巾同萬寧牌紙巾。」
阿思：「雜嘜好易變梅菜，我唔用。」
Florence：「雜嘜捽兩嘢就霉晒，唔掂。」Eavin：「買報紙送嗰啲雜嘜牌子都會用，無謂嘥嘢嘛。」
老翻網上晒冷
好耐之前已經有網友將辛辛苦苦收集番嚟嘅疑似Tempo放上網大晒冷，留心啲睇吓，第一行由左至右第四包係Taipo，大埔呀，唔知幾時會出番包大澳呢？
