成日都好夜放工，銀行嘢都要夜晚喺屋企用電話理財搞掂，但前晚打電話換東亞銀行積分禮品時，發現有唔少「陷阱」。我諗住用信用卡積分嚟換「亞洲萬里通里數」，因為差少少里數夠換免費來回日本機票。我按語音指示輸入卡號碼、密碼等、亞洲萬里通會員編號，但系統話我輸入錯誤，搞咗5、6次都係咁；打電話去客戶服務部，女接線生話：「我哋每晚10點後至第朝8點，都會更新系統，未必換到。」
又話24小時熱線，成日更新點係24小時呀。我噚日再打電話問，今次個男接線生解釋，原來語音系統要求提供嘅「編號」，唔係亞洲萬里通會員編號，而係「禮品編號」，普通卡係8003、金卡8004、白金卡8005。
真係唔講唔知有個咁嘅編號，電話系統完全冇提，個接線生話：「之前寄畀客戶嘅單張入面有提過嘅。」唔通要客戶摷番出嚟咩，而且好多都丟咗啦，點解唔喺電話提醒客戶。東亞公關就澄清系統運作正常，最近都冇需要更新，但客戶如果喺電話換唔到禮品，可以傳真去36086038嘅。
逢周一至周四刊出