假如特區政府聽從任志剛總裁之言，四月一日起向全部公務員減薪一成，僱主聯會又可以勸服所有僱主減薪一成嘅話，香港仲會唔會有通脹呢？既然金管局嘅研究指單位勞動成本上升係過去幾個月本地通脹急升之主要原因，對症下藥、打擊wageinflation嘅政策容易到極，就係凍薪、減薪。任總裁人工高過聯儲局總裁、英倫銀行總裁、歐洲央行總裁、日本央行總裁、中國人民銀行總裁等人嘅薪水總和，智慧與責任高好多，佢既然咁講，一定有根有據，就請佢起帶頭作用，自己減薪五成先，幫助香港減輕通脹壓力。
不過咁，即使任總減薪五成，泰國米（Ａ級）價格會唔會自每公噸一千美元回落至○三年嘅三四百美元水平呢？油價會唔會降到七十美元一桶呢？中環寫字樓租金會唔會下調六成，山頂豪宅呎價會唔會跌至八千元呀？睇落就唔會嘞，世界市場上之豬肉、牛肉、食米、玉米、黃豆等價格點會與香港工資扯得上邊吖，香港人嘅工資減五成，泰國米仍然會照樣加價！
過往我哋要求老闆加人工，係為咗追上通脹，八十年代尤其如此，當時通脹每年達到兩位數字，公僕年年奉旨加薪，私營機構人工追都追唔切，當年任志剛先生仲係公務員，特區政府經濟師唔識得研究加薪與通脹係蛋生雞吖還是雞生蛋，只知道加薪彌補因通脹而損失咗嘅購買力。好咯，任總裁領導之權威機構金管局還有權威研究發現，就係「單位勞動成本」（UnitLaborCost）係本港通脹之主要原因，確定咗工資係因，通脹是果，以後大家唔好藉詞通脹上升而要求加人工嘞，大家唔加人工就唔會有通脹，或者通脹微不足道啦！
聽講唐司長、曾司長以至振英哥都可能競選二○一二年特首，佢哋如果請權威任總做經濟顧問（到時任總已經退休好耐，過完冷河），提出如斯論調，你估會唔會民望大升呢？