大陸股市連升四日後，噚日大幅回吐，上海A股更急跌超過5%，嘉賓相信內地股市並非跌勢重臨，只屬調整，向投資者大派定心丸。
黃：黃敏碩 何：何啓聰 孫：孫柏文
孫：噚日上海A股插水5%，係咪彈完又急跌呢？𠵱幾日入咗A50基金（2823）同翔龍基金（820）嘅散戶使唔使擔心？
黃：急跌可能因為內地投資者缺乏信心所致，望穿秋水都未見救市措施出台，所以出現減磅，但其實大陸股市由高位跌咗咁多，都開始吸引，現時只係欠缺有力嘅信心措施。
何：內地股市短短幾日由低位反彈，但冇乜新政策出台之下，上海A股指數幾難升穿4000點，可能有啲投資者擔心，開始獲利離場，不過現時就算回吐調整都係合理。
孫：嚟緊港股嘅走勢又點？
何：現時港股喺24500點有派貨嘅格局，但相信短期唔會大跌，因為恒指由20500點升到上24600點，升咗差唔多4000點，家陣回吐落番23500點亦唔係冇可能。
黃：嚟緊美國公司又開始公佈業績，美股可能未必撐得住，對港股都會帶嚟隱憂，而大陸股市嘅回吐，亦都可能係擔心下個禮拜公佈消費物價指數而出現嘅自行調整。
七蚊邊入財險炒波幅
關公：想問吓隻中國財險（2328），見佢呢幾日有啲波幅，打算等佢落番7蚊邊入短炒一轉，點睇？
何：財險喺7蚊水位入貨都冇壞，就算作中長線部署都可以考慮，因為上海A股應該喺3300點水平有支持，保險股亦有機會喺呢個位跟住反彈，問題係點解你唔揀隻平保（2318）？
關公：股價貴啲，買財險可以入多幾手嘛！
黃：相信財險喺低位反彈機會幾高，不過如果要揀保險股，都係揀啲大隻嘅保險股好啲，因為財險要擴闊業務收入，會比中國人壽（2628）同平保遜色，不過如果關公純係炒rangetrading，捕捉波幅上落問題都唔大。
