沙田陳師奶最近發覺菲傭去超市買餸，伸手要錢嘅次數增加咗，於是叫菲傭拎張收條嚟逐項檢查，發覺單位價格好似升咗唔少，於是親自帶埋菲傭落超市，現場查看價格，方知道唔講得笑，百物騰貴呢句成語有真正意思，就係一百件物品、消費品都貴過一年前；買米角落有唔少師奶阿婆搶買泰國米，菲傭好擔心咁問：「Madam，係唔係會有仗打，我哋使唔使去輪購幾袋米？」沙田陳師奶又見到唔少人去搶買罐頭，一時間把持不定，打電話問老公：「會唔會有事㗎？買定啲米、罐頭、廁紙，好唔好？」老公正愁緊寫字樓加租七成同大業主講緊數，大喝一聲：「要信溫總，中國保證香港同胞有充足食米供應！」於是作罷。沙田陳師奶與一般阿太嘅感覺係：通脹真係打到嚟，同佢哋講甚麼核心通脹仍然處於低水平，佢哋完全聽唔明，亦覺得政府講風涼話，不識民間疾苦。（按：核心通脹即指扣除食品與能源價格之通脹率，如果你唔揸車、少用電、少用煤氣，唔多食飯或食麵包嘅話，你不會感覺到有高通脹。拆穿咗，講核心通脹之人，即不食人間煙火之徒，呃鬼食豆腐之輩。）
陳師奶來電話問左丁山：「點解通脹咁高呀？」左丁山話：「我點識呀，我以為係港元隨美元貶值，人民幣升值，泰國銖升值，而香港所有食物都自中國、泰國、澳紐及其他地區輸入嘅，故此產生所謂輸入通脹，但權威專家任志剛總裁話唔啱，港元貶值一巴仙，香港通脹只會增加零點一巴仙啫喎。」陳師奶又問：「咁既然任總講到冇入口通脹，咁係乜嘢通脹？」左丁山再答：「你睇今朝報紙，任總裁話工資才是通脹元凶，因失業率降至十年新低，以致單位勞動成本在過去一年掉頭回升，才是近幾個月本地通脹上升的重要原因。」
陳師奶待老公放工回家，問老公，「你唔好加人工畀夥計嘞，任總話人工升推高通脹，搞到我買餸都貴咗好多。」老公聽完，大叫一聲：「任總人工，全世界中央銀行之中以佢最高，梗係唔使加人工啦，曾特首帶頭向公僕加薪，任總有冇叫特首唔好加呀？公僕加薪，乃高通脹之禍首！」