國際原油每桶企硬100蚊美金大關，但內地成品油價格卻差成條街。搞下游煉油業務嘅上海石化（338）董事長戎光道，噚日就喺業績記者會上猛呻，話既要照顧股東利益，又要盡社會責任，冇可能刻意減低成品油產品嘅數目，公司嘅煉油業務根本白做，皆因生產每噸石化產品都要蝕錢。
佢自嘲公司好似困難戶咁，由05年起每年都要向國家伸手攞財政補貼，但管理層都唔想，攞補貼非常之唔光彩，但自己又冚唔足巨額虧損；之不過外界又唔明白，一味問點解政府要畀公司攞着數。
戎總好委屈咁話，關鍵係成品油價格機制，只係「陰啲」咁發指令適量提價，佢話應該逐步推向市場主導。其實，阿爺唔畀成品油價格喺市場自由浮動，就係驚通脹越飆越高，令內地經濟升爆煲嘛。民族利益當前，石化股怕且都要再忍吓啦。