所謂一沉百踩，兩年前仲係大紅大紫嘅細哨，如今失意於巴塞隆拿，會方噚日話明唔要佢。有關佢嘅出路，謠傳滿天飛，其中一個係投身啱啱申請參加圖圖盃、衰到「走後門」嘅AC米蘭；仲誇張嘅，甚至係加盟北京國安，斷估佢未至於折墮到咁啩？
細哨去AC定國安
雖然AC米蘭班主貝盧斯科尼早兩日講到：「朗拿甸奴一係唔離開巴塞，否則一定嚟AC米蘭」，不過西班牙《馬卡報》指，「細哨」個大佬兼經理人羅拔圖原來一直同國安方面有偈傾，而有傳馬勒當拿有可能教國安，一旦成事就力邀細哨，信不信由你。
實際啲，細哨投AC米蘭可信性當然高好多，話晒貝老真係追咗佢好耐，加埋隊波多森巴兵，啱key。不過AC今期衰到貼，最新消息係會方為爭取參加來季歐洲賽，已向歐洲足協申請參加圖圖盃，唔通衰到冇信心爭前6？呢單嘢通晒天後，副會長加里安尼死撐話呢啲係正常程序，但AC家陣喺聯賽榜只排第5，多第7嘅烏甸尼斯1分咁大把，又真係似要留個後着。大家都知圖圖盃7月左右就開波，假如AC衰到冇信心，連呢啲盃仔都要用埋班球星，咁細哨就有機會一嘗「走後門」嘅滋味，到時唔慌唔爽死囉。
巴塞確係立立亂，以今季表現，大換血在所難免，除咗「細哨」，另一大牌亨利都可能被賣走，而且有可能回歸英超。消息指巴塞已為佢開價1,600萬鎊（1.85億港元），呢個價，求才若渴嘅曼城、紐卡素等都出得起。點都好，亨利食回頭草返英超，比起細哨可能要踢圖圖盃，或者投效中超球隊，已經係幸福得多囉。