就快到北京奧運，不禁令華華諗起一班中國奧運英雄。咁啱噚日李寧（2331）出咗年報，當然睇睇當年體操王子今日嘅「身價」，主席李寧（圖）07年度酬金總計501.9萬人仔，比06年度287.9萬，升幅74%，雖然比起好多上市公司嘅主席年薪過千萬，李寧加咗嘅人工都唔算高，但比佢當年做運動員嘅收入應該多好多。
華華睇過啲報道，80年代嘅中國運動員，喺國際賽獲獎，國家頂多都係名譽性質鼓勵，絕少巨獎發放。
之不過，李寧收入多極都只係排第三，另外兩位執董張志勇同陳偉成，07年收入分別有919.9萬及698.4萬人仔，分別加咗92%同138%。
另外，曾經令散戶如癡如醉嘅阿里巴巴（1688），主席馬雲07年度冇收人工，原因係佢冇再出任公司首席執行官，唔直接參與實務。至於佢份糧就過咗畀現任首席執行官衛哲。衛哲07年薪金花紅連津貼有273萬人仔，比06年29.1萬加咗幾倍，計埋購股權嘅價值，07年度酬金總額3531.8萬人仔。