港股連升四日後昨回吐，不過，市場每日都有焦點股可炒，商品股近期被投資者追捧，主持及嘉賓昨日分別看好紫金礦業（2899）及江西銅業（358），兩隻股昨日均逆市上升，紫金收報8.6元，升7.5%，江銅收報16.78元，升2.32%。
姚：姚浩然 楊：楊慧玲
姚：雖然恒指跌咗200幾點，但相信呢一輪反彈浪冇咁快完，因為港股已經連跌5個月，而最近嘅反彈浪係由復活節後開始，恒指只係升咗兩個禮拜，加上外圍市況又唔係太差，上個禮拜美國公佈最新就業數據雖然差過預期，但道指仍然企得幾穩，估計港股反彈浪仲未完。
楊：紫金呢幾日股價被挾高，由之前六個幾，升到家陣嘅八個六，佢仲有冇上升動力？
姚：其實紫金之前跌得多咗，所以今次有好嘅反彈，暫時紫金喺9蚊有阻力，跌到落8蚊可以考慮入貨，目標價睇10蚊到10.5蚊。不過自己較睇好江銅，相信佢嚟緊嘅業績會有驚喜，投資者可以諗吓喺佢四月尾公佈業績前先入定貨。
楊：咁你即係睇好江西銅多過紫金？
姚：係，紫金係炒A股因素，而江銅受惠業績轉好，如果盈利增長一至兩成，市盈率都只係8倍左右，估值吸引，防守力強。
楊：咁即係可以將佢哋放喺觀察名單。
炒板塊下個到煤股
鄭先生：發覺近排個市好似炒板塊，之前先炒滙豐（005）、跟住上星期睇你哋節目入中移動（941）同港交所（388）都賺咗錢。嚟緊我諗會到資源股，煤炭股中國神華（1088）幾吸引。
楊：中煤能源（1898）都跑先，市場預期盈利升八成。
姚：以神華嘅估值，現時市盈率廿幾倍都可以接受，但講到值博率同估值吸引，不如揀中國鋁業（2600），江銅（358）同紫金（2899），相信煤炭股只係中間攝位上。
楊：石油股呢？
姚：石油股𠵱家估值吸引，但盈利受暴利稅影響，股價上升有壓力。
楊：神華抗跌力強，但反彈力度未必有其他煤炭股咁大。
姚：唔好期望佢反彈好多，40蚊樓上會有好大阻力。
內地股市旺利好A50
黃小姐：想問A50中國基金（2823），佢冇業績同市盈率都升嘅？
姚：A50唔係上市公司，所以股價上落要睇內地A股，由於近月A股跌唔少，投資者覺A股吸引入貨，刺激A50升。
黃：佢同翔龍基金（820）有乜分別？
姚：翔龍基金除咗投資A股亦買H股，早輪H股反彈，翔龍基金跑先過A50基金。如果睇好A股，可買喺香港上市同揸唔少A股嘅大陸保險股，亦可諗吓光大控股（165），佢內地有證券同銀行業務，大陸股市好，有利佢分拆業務。
