踏入08年，樓市明顯冇咁旺，代理行唔知係想谷吓班員工，抑或想冲喜，中原噚日話，為咗「答謝一眾後勤的默默耕耘」，所以一眾非營業員（即係後勤啦）都可以喺第一季收到四分之一個月花紅。
其實地產代理好景時，每季都可以分花紅。好似舊年全年中原就出咗16個月糧，同行美聯（1200）就出咗18.2個月糧，巿傳舊年美聯有位後勤足足𢭃咗40個月人工。
華華知道每間地產代理都會鬥個你死我活，班後勤雖然唔使出去跑生意，但一樣要幫手撐住班前線，某間地產代理嘅公關話，佢哋每次都要諗計推盤，少啲腦汁都唔掂，所以中原今次派花紅，班後勤袋得問心無愧啦！只係唔知嚟緊一季仲有冇得分啫。