林熙蕾憑33C、24、35嘅魔鬼身材，噚日喺台灣以「我愛蕾胸圍」代言人身份出席宣傳活動，佢着住白色低胸露背長裙，以白雪公主形象亮相。不過企喺一班着住性感內衣嘅模特兒前，林熙蕾嘅打扮明顯輸蝕。現場播放林熙蕾早前着上低胸裝、酥胸半露拍攝嘅廣告片。
對於出席內衣宣傳打扮得咁密實，林熙蕾話：「要看內衣就看廣告啊！」當傳媒話鍾意睇佢性感一面，佢話：「那就買票進戲院看啊！」
「你們自己發揮」
林熙蕾喺記者大逼供下，直認喺屋企唔會着內衣。佢早前俾雜誌偷影到同緋聞男友朱孝天同處一室嘅照片，同佢拍攝嘅廣告內容好近似，佢解釋話：「難道以後推窗的戲我都不能拍？」
林熙蕾又話爸爸同細佬都識煮飯，所以對會煮飯嘅男仔份外有好感，莫非因為咁而對廚藝了得嘅朱孝天加分？佢話：「好啦！你們自己發揮，不要太過份就好。」
製作人張家振即將同唐在揚及楊紫瓊成立新公司，林熙蕾已簽約成為旗下藝人，問熙蕾係咪想進軍荷李活？佢話：「沒有想太多，也不是想去荷李活，只是覺得他（張家振）是一個認真的電影人、資歷也深。」