商品大王羅杰斯（JimRogers）3個禮拜前再度做老竇，生咗個趣致BB女，名字叫Bee，中文名蜜蜂。商品大王喺教人投資之餘，不忘同大家分享做父親嘅喜樂。
羅杰斯噚日應荷蘭銀行邀請，嚟香港推介其羅氏商品第二代指數掛鈎投資產品，喺投資簡介PowerPoint上，第一、二頁就係佢同兩個寶貝女影嘅靚相。同大女一樣，羅杰斯話會請個講普通話嘅保母，教細女講普通話，並為女兒投資中國股票。
等股市現恐慌大手買
佢又透露下一本要寫嘅書，將會係《致女兒的信》，內容係教囡囡點樣生活，最緊要識得自己做決定，例如佢哋嘅人生，喺股票市場嘅投資，都要由自己決定，唔好輕易相信男仔！有個商品大王老竇，畀着華華係Bee小姐男朋友，調轉頭叫「未來外父」幫我投資好過啦，吓嘩！
羅杰斯喺記者會上仲醒咗大家一個捕捉入市先機嘅貼士，佢話當股市出現恐慌性不問價拋售，報章同電視均以頭條大篇幅報道大跌市之際，就係入市最好時機，到時你要傾盡所能，大手低吸股票咁話。
待空氣改善遷居香港
移居新加坡後，羅杰斯仍然對香港念念不忘，佢話中國同香港都係佢最鍾意嘅國家同城市，只要香港嘅空氣清新一啲，佢會即刻搬嚟香港居住。華華打趣同佢講，根據「十一．五」規劃，到2010年中國要求在節能減排上達到一定目標，屆時香港空氣可能會有所改善，佢就話到時記得通知佢！
電郵：mailto:[email protected]
