好多人未必炒股，但都會受股市下跌拖累，好似中移動（941）同網通（906）兩隻中國電訊股嘅董事，因為公司股價跌，搞到07年度嘅薪酬大縮水。
中移動董事長王建宙，同06年嘅942.8萬相比，07年只係𢭃得505.5萬！佢份薪金連津貼冇變，一樣係117.2萬、袍金冇變仍然係18萬銀、花紅冇變有66萬、只係退休金供款多咗，不過由於手上嘅中移動認股權價值就由06年度嘅716.1萬銀，跌到得277.3萬銀，跌咗61%，就係咁整體人工就足足縮水46%。
同行網通董事長張春江，07年度共𢭃人工101萬人仔，比06年嘅109.4萬人仔，微跌7.7%，但係實際薪酬及津貼有84萬人仔，比06年度升咗一成。以金額計係唔夠王建宙咁多，但有人工加都值得恭喜。
李智康花紅加得勁
另外，盈大地產（432）噚日亦出咗年報，CEO李智康07年度薪金津貼冇加到，但花紅有成1985萬銀，比06年度足足多咗1.7倍。唔知係咪貝沙灣賣樓賣得好，所以小小超分多啲花紅畀佢呢？