人氣急升的張敬軒前晚假紅館舉行首場處男演唱會，由其緋聞女友王菀之罕有地谷胸上陣擔任表演嘉賓，與他大跳辣身探戈舞，但張敬軒反應只是一般，反而關楚耀主動向他咀嘴後，性向一直成疑的他才笑到見牙唔見眼，幸好與他傳緋聞的關智斌（Kenny）未有到場，否則必定睇到眼火爆。
張敬軒初踏紅館台板，一連三場「aigomusic酷愛張敬軒演唱會」前晚正式開鑼，其間軒仔換了多套靚衫登場兼自彈自唱，又挑戰自己大跳勁舞，被舞蹈員抬起後空翻落地，並拗腰做拱橋動作，令觀眾拍爛手掌，住在天后的軒仔還向觀眾打趣說：「我跳得好唔好睇？我轉做偶像派，要做天后阿Rain。」
紅顏知己
「我哋排骨蒸五花腩」
擔任表演嘉賓的軒仔緋聞女友王菀之（Ivana）其後出場，她身穿吊帶低胸裙，鮮見地谷胸上陣，十分性感，二人合跳貼身探戈時，Ivana從後攬着軒仔，又輕撫他的面頰，但軒仔均反應不大，更取笑Ivana有肉地，他說：「我哋係最新組合，我係排骨，佢係五花腩，排骨蒸五花腩。」Ivana則笑問軒仔：「你今日做乜視線咁低？」軒仔即答：「我鍾意睇有料嘅嘢。」
Ivana又說：「今日算係咁，平時我着衫高到上鎖骨，袖就去到手腕，算係露乜嘢啦！」軒仔說：「真心多謝你，開騷前好多傳聞講我哋，無論點都無損我哋感情，多謝上帝放呢個好朋友喺我身邊，最霉時我問佢借2,000蚊。」語畢二人即合唱《手望》。
緋聞女友表演後，軒仔便介紹男嘉賓出場，他說：「跟住個嘉賓姓關。」觀眾即大叫其斷背男友關智斌的名字，軒仔卻說：「姓關唔一定係佢，可以係第二個。」原來嘉賓是其契細佬關楚耀。
關楚耀甫出場即笑說：「我上嚟送禮物，fans唔介意。」接着竟嘴對嘴錫了軒仔一啖，笑到見牙唔見眼的軒仔說：「我紅館初吻畀咗你。」關楚耀抵死地說：「你咁多圈中好友咁錫你，你唔介意，況且我又係姓關。」軒仔隨即揶揄關楚耀與衞詩的緋聞說：「食碗面反碗底，你估衞詩有冇嚟睇？」關楚耀便打圓場笑說：「唔緊要，你嗰個同我嗰個都唔係真。」雖然關智斌前晚未有到場，但軒仔也獻唱了關智斌的歌曲《預言書》。
其後軒仔又多謝圈中朋友及父母支持，他說：「我好幸運，有咁嘅父母，有機會happy完，再生到我。」遭台下女fans狂攬後，他又笑說：「啲女仔好熱情，唔係錫，係撞埋嚟，但撞得好舒服。」軒仔又謂自己不是「張勁囂」，而是「張勁賣」，他說：「唱片公司梗係想，但呢個賣係話我出賣朋友，成日用朋友古仔做靈感。」
同志緋聞
預告Kenny尾場亮相
個唱中軒仔唱了謝安琪的《鍾無艷》，但因忘記歌詞甩嘴，又唱陳百強金曲向他致敬。事後軒仔自評演出有70分。問到Kenny為何未往捧場時，軒仔即事先張揚Kenny會欣賞尾場，但不會上台，有記者笑言Kenny上台便可親自錫他，軒仔即尷尬地說：「唔知點答，放過我啦！」
記者昨日發現已有人將軒仔的個唱片段上載到YouTube網站，包括軒仔與Ivana共舞及獻唱《酷愛》的片段。此外，謝安琪昨日在鑽石山出席活動，提到她送給張敬軒的花牌上寫着「點解唔搵我做嘉賓？」是否有特別含意時，她說：「之前有報道話佢唔請我做嘉賓，所以我嬲咗佢，咁咪諗住將個古仔繼續落去囉，我梗係唔會嬲啦。」對於軒仔在個唱上演繹其歌曲《鍾無艷》時甩嘴，她笑說：「佢啲一線歌手都唱到咁，證明呢首歌真係好難唱。」
採訪：胡比 攝影：陳偉權
街訪：觀眾讚多過彈
張敬軒前晚在紅館舉行個唱，全場爆滿，反應熱烈，大部份觀眾對他的首個演唱會相當滿意。
葉小姐：我畀佢90分，佢唱謝安琪首《鍾無艷》有唔記得歌詞，但大致唱歌同跳舞都OK，不過張敬軒對四面台經驗唔係好夠。
潘小姐、胡先生：第一次喺紅館開演唱會，表演OK！我哋畀80分，佢同王菀之嗰part最好睇。
小白：成個show好正，我畀99分，每一part都好睇，但世界冇完美，所以我唔畀100分，但都係水準之上，跳舞都有驚喜。
小八卦：舞衣抄襲名牌
張敬軒演唱會找來設計師陳華國為他及舞蹈員設計歌衫，早有抄襲前科的陳華國，今次在軒仔個唱上又再重蹈覆轍，舞蹈員所穿的一款灰色LOVEHIN立體字T恤，構思與荷蘭品牌Viktor&Rolf08年秋冬裝其中一款設計（左圖），幾乎同出一轍，抄襲靈感相當緊貼潮流。
小八卦：紀念品反應差
張敬軒前晚的個唱場外，設有攤位售賣T恤、貨車帽、鎖匙扣及環保袋等紀念品，除環保袋外，其餘貨品都有分普通版和特別版，普通版紀念品連環保袋一套售500元，特別版連環保袋則售900元。前晚所見，排隊的人不算太多，反應一般，加上現場沒有圍欄，秩序混亂。
