威士忌近年一洗老餅形象，不論卡拉OK定係俗稱的劈場，無不幾支上枱，問題只是溝咩而已？口味是次一等的談論範疇，賣醉卻是最終目的。眾人眼中的常規，鄒凱光唱反調叫亂晒龍。懶識嘆只是班門弄斧的把戲？即管聽聽他威士忌的故事，學他一招半式，與威士忌共存，打開你腦子裏早已閉塞的門。
攝影：楊錦文
口述：鄒凱光（筆錄：許維雅）
場地提供：798UNIT&CO.（23660234）
http://appleblogpaper.blogspot.com
aboutme:鄒凱光
我的心願娛樂自己娛樂人。
威士忌的記憶體
呢個世界飲酒有兩種人，一種是求醉求飲，另一種是深究年份、飲法的專家，不過我是第三種，唔會劈亦怕記，以感性出發，只希望用酒帶起回憶。由細到大只懂飲啤酒，到八、九十的紅酒年代才跟人飲吓紅白酒。老牌酒威士忌卻從不愛沾，可能就是怕了它又兇又惡的烈酒形象。直至99年認識了一位好喜歡飲酒的朋友，有次到他的家作客，卻見全屋只有威士忌，好奇一問才得知他原來有個一世不能衝破的死穴、一個揮之不去的記憶。他飲任何酒都千杯不醉，唯獨飲威士忌就兩啖倒地。起初還以為是威士忌的問題，不憤地試完一隻又一隻，結果還是一樣。忍不住找醫生了解，答案就是記憶：「你以前可能飲過威士忌醉咗，大腦記憶咗呢個反射，永遠自然地將兩者連埋一齊。」最後問番屋企人，原來他12歲時曾經被Uncle捉弄飲威士忌，最後不省人事到完全失去了那段記憶，自此大腦就Set了一個Delete不了的File。找到原因亦無謂再鬥氣，20多支威士忌毫不吝嗇地請我任飲。一啖MACALLAN25落口，完全跟街場飲開的BlackLabel截然不同，第一次感受到靚酒的AfterTaste。一啖如滾油的熱火由喉嚨一路落肺，再由肺走回兩邊耳仔進入大腦，感覺良久不散。以往飲酒總令我有些少暴力、鹹濕、賤格的衝動，從來都只好用理智按捺住，但那真正的一嚐才發覺原來嘆靚酒是另外一回事。即使亢奮，所看事物都會變得美好，寒冬呷一口更會感覺特別舒服。試過成班朋友食魚生送威士忌，有次再圍埋望見碟魚生，幾個朋友都忍唔住走出去抱支威士忌回來，一支好酒會令你回憶背後開心的故事。
飲酒的最佳時間
頭兩年會刻意研究，認識了很多不同種類的威士忌，但卻飲得最痛苦。同自己講：「飲酒咪飲酒囉，當初唔鍾意飲紅酒都係因為咁。點解要記咁多嘢？知幾多都冇用，最後都係要試。」尋覓兩年，發覺最愛都是MACALLAN18，找啱伴侶的感覺令你不欲多作新試，跟談戀愛不同。一向花心的，會對酒特別專一。習慣飲完一支買一支，若然想試酒，會約定朋友一齊試，有咩事都可以成班一齊捱咗佢。舊版、更貴的MACALLAN有試過，味道略勝卻不太化算。找啱對手，一晚開一支飲，那份豪情幾適合一班麻甩佬暢所欲言。每次最想飲的時間是喉嚨不適，一啖暖暖的威士忌可以令喉嚨放鬆。要飲酒升到另一層次，大家不妨朝起飲少少，這個方法是老闆俞琤所教。一個人狀態最好的時間就是朝早，酒是能幫到你相得益彰，感覺會精神亢奮，更可免除夜晚劈酒的罪惡感。我周不時會跑入赤柱，用細酒樽帶少少酒去送早餐。天氣好、對住海景嘆酒的感覺，那份酒意才是真正的享受。
與酒共存通思想
我從來都反對別人送酒作禮，朋友唔啱口味只會浪費，更可能換來一個慘痛經歷。表弟從外國回港，言談間一直以為他同是愛酒之人，我專誠跑去買支Ballantine's3O齊齊品嚐。小個便回來，竟然見到枱面有一瓶梳打及綠茶，4千蚊支酒咁樣溝法真的浪費，那一刻個心又赤又痛。近5、6年，看住老餅酒威士忌打入年輕人市場，當年還拍手叫好，讚嘆他們的市場策略如此成功，之後才發覺令年輕人對品酒有誤解。及後聽見人話：「唔好！飲威士忌唔應該溝梳打綠茶！」那一刻我還以為他們終於醒覺，怎知他們卻補句：「溝紅牛、雪梨水啦！」聽見真是氣憤，飲酒不應該如此，絕對是錯誤的方向。戒掉啤酒多年就是無謂成肚水，左溝右溝我亦飲過，但感覺討厭。細細淺嚐威士忌才能認清它真正的味道，加少少冰或一些暖水亦可。最高境界是視酒作朋友，與它共存，不必支配抗醉鬥強，亦切忌依靠到無酒不能。能成功控制，思想都會變得美好，幫你打開腦裏面好多道門。平日閉塞的思想，想不通的地方都能突然舒暢。小心！多則亂，控制份量亦是嚐酒的關鍵所在。
最新回應
Daren：我有儲酒嘅習慣，最近搵緊JohnnyWalker嘅特別版，有支舊到唔捨得飲，得閒攞出來嗅吓已經開心。應唔應該儲酒只係各有所好啫。
相關超連結
http://www.watsonswine.com/WebShop/Home.do
Watson'sWineCellar係較大的賣酒連鎖店，酒類亦十分齊全。網址除找到不同酒類的價錢及資料，亦有網上訂購及舉辦試酒會的服務。
