加料 方包變跑手

加料 方包變跑手

方包係我最愛嘅食物,貪佢簡單又好味。不過耐咗都會覺得有啲悶,想搽番啲果醬。不過點都估唔到呢種心態,竟會延續到去揀車方面。話說日前試咗部NissanCube1.4WaldVersion,初頭諗,Cube一部,方包Look,出晒名。望真啲,原來此「包」加咗料,一套Wald跑車包圍同胎軨,登時變方形小跑。情形就好似加料白方包,嗒落有味!

記者:鄭達基
攝影:陳盛臣
模特兒:Carey

加Kit方匣子

講真,如果擺部新款ToyotabB同NissanCube喺我眼前,我一定會揀前者,原因好簡單,雖然兩者都係用方匣子Style示人,但bB個Look畀人嘅感覺後生同靚仔好多,唔似Cube咁有啲成熟……
之不過,如果係呢部WaldVersion嘅Cube的話,結果就肯定會掉番轉。因為佢加裝咗一身由Wald提供嘅包圍,當中嘅部件包括加有擾流設計嘅頭尾泵把、車身兩側裙腳同超大尾翼。不過,我最鍾意都係佢仲換埋Wald嘅17吋跑車合金胎軨連跑車專用超薄輪胎、尾燈同車側指揮燈都加有電鍍框邊作襯托,連屬Facelifted新版專用嘅鬼面罩,都同車身一樣噴埋白色,令成部車睇落去個Look好似成部方盒小跑車咁,型到想喺條街上面搵多部都無呀!

■車尾頂置定翼,大到可以用嚟當簷篷避雨。

■頭泵把新加擾流設計,中間仲有入風口。

■喺泵把上嘅尾燈,新加入電鍍框邊作襯托。

■兩側指揮燈加有電鍍框托底,旁邊仲有藍光LED燈㖭!

■胎軨係Wald嘅17吋出品,輪胎則係跑車專用嘅薄胎。

車廂依舊簡潔

雖然呢部WaldVersion嘅Cube喺外形上有咁多改動,但車廂陳設就無咩大變。整體畀人嘅感覺都係簡簡單單,唔會有太多花巧嘢出現,無論係顯示車速嘅錶板,又或者係直立式嘅中控台,都係以簡潔實用為大前提。不過由於佢係Facelifted版嘅新車,所以座椅花紋都有啲改動,加上方匣子嘅車廂設計可以用盡每一吋空間,從而令生得高大嘅乘客都可以坐得好舒服。
另外,引擎亦係原來嗰台1.4公升型號,馬力輸出98匹,但礙於車重幾近1.1噸,平坦直路起步加速都算快,但如果載滿人兼開埋冷氣上大斜路嘅話,咁就真係要拖低一個波兼且踩大油啦!

■較闊大嘅前座乘客席,部份椅背可放低做手枕或儲物匣。

■車廂陳設依舊,連波箱都繼續係軚波設計。

■乘客席前方有雙層儲物匣,冷氣風口更可完全關上。

■中控台係直立式Design,上層係音響下層係冷氣控制鍵。

■後排空間闊落,就算生得幾高大,都一樣坐得落!

新車速蘋
讚:

.加裝一身Wald包圍,成個Look即刻型晒。

.方形嘅車廂設計,可用盡每一吋空間。

彈:

.車廂陳設一切依舊,感覺似乎普通咗啲。

.始終係1.4公升偈,想踩快啲都要啲時間。

供款幫你計

首期:$18,800
利率:5%
年期:48期
每月供款:約$4,230
註:以上數據僅供參考。

規格

引擎:1,386c.c.直4DOHC
馬力:98ps/5,600rpm
扭力:14.0kgm/3,200rpm
傳動:4前速自動波,前輪驅動
尺碼:3,730×1,670×1,640mm
軸距:2,430mm
車重:1,080kg
車輛提供:WaldHK(28388410)
註:尺碼、軸距及車重均為標準版數據。