年初剛獲委任為滙控（005）143年歷史上，首位華人執行董事嘅獅子行亞太區主席鄭海泉，今年稍後就慶祝六十大壽。噚日鄭大班撥冗見傳媒，當然離唔開俾老記問及退休問題，Vincent（鄭之洋名）話𠵱家冇退休計劃，將來嘅事就等集團決定啦。佢又不忘發揮滙控嘅團隊精神，話個人去留係唔重要，滙控不嬲都有一流嘅接班安排。
據華華了解，作為集團高級管理層，其實冇話一到六十歲就退休，只係原則上年過六旬，僱傭雙方都有權提出退休計劃。其實縱橫政經界嘅鄭大班，隨時都可退休「印印腳」嘆世界，做吓公職，不過飽受次按拖累嘅滙控，要靠亞洲市場做增長龍頭，睇怕都會盡量留住熟悉地頭嘅區內精英。
入行會？多謝抬舉！
自從寶哥哥辭任行政會議後，好多人都估煲呔曾如果要搵另一個賓架入會，睇怕夠份量嘅，非鄭海泉莫屬，對於呢啲揣測，大班就例牌話「多謝抬舉」，唔肯回應外界猜測。