呢幾年大家注重健康，潮流興食植物油，其中又以意大利、西班牙橄欖油最流行。餐酒Ｌ本來在荷李活道開舖賣歐洲飲品，見大勢所趨，當然賣埋橄欖油，左丁山聞訊，向佢訂購上等西班牙產品，佢服務真好，市區用戶訂兩瓶，沙田地區訂六瓶，隔日送上門，老友記畀埋折扣㖭。
餐酒Ｌ話蘇豪區一帶，餐館林立，原因之一就係名人之後，第二代第三代公子自外國讀書回來，一唔想打工，二唔想跟老竇，於是自行開餐館。一個大電子工廠家族後人就喺荷李活道原《華僑日報》舊址，由恒基興建嘅大廈內開咗一間西餐廳，個名好有意思，就係PressRoom，果然好有招徠，生意甚佳，但價錢就高到餐酒Ｌ話：「幾肉赤，入內只能負擔洋葱湯，漢堡包！」如果個個都係餐酒Ｌ咁孤寒，唔捨得食，蘇豪區邊度會有咁多餐館呀。呢位年青老闆再接再厲，食住懷舊條水，喺灣仔舊當舖和昌大押租下舖位經營新餐廳，取名ThePawn，真係噱頭十足，有諗頭之至。懷舊/集體回憶原來可以帶來商機。人哋嘅腦筋動得真快。
中環洋人出沒多嘅食肆酒吧，一定有一份雜誌派，就係HKMagazine，內容以飲食娛樂為主，廣告頁數都幾多。餐酒Ｌ對左丁山講：「嗱，你假假哋都係傳媒人，現在有機會畀你發圍呀，呢份HKMagazine傳出賣盤消息，有行家曾經作初步接觸，得知嗌價（askingprice）係EBIDTA嘅八、九倍，你不如諗諗！」唓，諗都唔使諗，自己邊度有咁多錢吖，八至九倍EBIDTA可能等於十零倍P/E（市盈率），買本免費雜誌，抵唔抵呀？如果真係抵嘅，何生、楊生、吳生等大老闆一聲話要買，我哋呢啲小戶即使話夾埋有錢，都唔夠啲大老闆bid啦。呢份免費雜誌在香港、上海、北京、新加坡都有出版，聲譽唔錯。聽講英國一份文化、飲食刊物TimeOut亦有意來港發展，呢類刊物可能最啱本欄昨日講過嘅回歸派學生睇，香港人就未必啱口味。