曼聯球星基斯坦奴朗拿度（C朗）好波係人都知，估唔到連搵女友都專揀「同類」，即係「好波」美女，好似最新嗰位西班牙女友妮莉達上圍有成36吋，認真洶湧澎湃！等閒男士對住呢種尤物，真係分分鐘七孔流血而死㗎！
妮莉達現年25歲出生西班牙，身高1米68，三圍36-23.8-36，憑魔鬼身材晉身模特兒界，得閒仲讀下校外課程，絕對智慧同美貌並重㗎！呢位啡啡哋嘅拉丁美人，同南歐陽光少年嘅C朗可謂朗才女貌，一埋牙仲唔殺到天昏地暗咩！
新歡擁魔鬼身材
話時話，C朗對「好波」美女真係情有獨鍾，之前嘅英國電視台姐仔珍瑪，上圍就有36E；而葡萄牙女演員羅梅羅的上圍亦有35吋，真係要幾大、有幾大。啱啱兩個禮拜前，C朗先傳同另一位美籍西班牙裔靚女搞埋，可見呢位球星追女仔何止追求size？換畫直頭好似換內衣褲咁㗎！
講番C朗同妮莉達呢段戀情，係始於1月，兩人喺馬略卡一間夜店相遇，之後女方不時飛去英國會情郎。3月底聯賽4:0贏維拉場波，當時C朗入波後向看台飛吻，就係獻畀看台上嘅妮莉達。據講，妮莉達已經見過晒C朗啲親戚朋友，似乎好認真咁噃！
如果妮莉達覺得C朗嚟真，就未免太天真啦！C朗情場修行咁高，又點會咁易畀你大到呢？何況，《星期日鏡報》周日撰文《C朗將同活士一樣大！》，就引述市場分析人士話C朗會成為體育界最大嘅明星，碧咸都要企埋一邊！所以話，你有36吋上圍，又如何？
其實，無論情場定球場，都冇咩人大得過C朗。最近皇馬就繼續挖C朗，今夏打算利用國際足協轉會條例第17條（如合約剩兩年，支付兩年人工即可買走），支付1,000萬英鎊（約1.6億港元）畀曼聯挖走呢位超級新星（原合約2010到期）。
我求大俠建議皇馬要施加美人計，對於血氣方剛嘅C朗嚟講，錢同女人肯定係半斤八両，雙管齊下就成事可期。如果皇馬體育總監米積杜域想買到好球員，就要搵定大波女啦！