泰國動作片《女拳霸》(Chocolate)嘅女主角JiJaYanin連日嚟喺香港做宣傳，都大耍真功夫，點知到前晚套戲喺圓方舉行首映，JiJa竟然着住短裙同高踭鞋同導演巴猜平橋(PrachyaPinkaew)一齊出現，男人婆換咗個look，成個人溫柔晒。
前晚嚟捧場嘅有莫文蔚一家四口、陳觀泰同樊亦敏等，JiJa見到莫文蔚，即時成個人勁怕醜，原來莫文蔚係佢偶像，佢透過繙譯話早前喺泰國有朋友話佢知莫文蔚到咗曼谷拍戲，佢即刻撲去想同偶像影合照，但係一見到偶像心情就勁緊張。
着高踭鞋驚扭親
而被邀上台同JiJa合照嘅莫文蔚話：「其實𠵱家我係佢fans就真，我之前喺泰國拍戲期間去咗睇戲，見到《女拳霸》嘅片頭，JiJa打得好勁，真係嘆為觀止。」因為語言阻礙，即使偶像捧場，JiJa都只係不停望住莫文蔚儍笑，成個小影迷咁款。
之後JiJa透過繙譯話，佢特登着裙打扮一下，但係覺得有啲怕醜同尷尬，因為佢平時着開牛仔褲同布鞋，今次係第一次着高踭鞋，好驚會扭親，仲腳震震㖭。問到對電影票房有乜嘢期望？JiJa就話冇諗過套戲可以喺外國上映，只希望觀眾覺得抵睇。
