玩具大王蔡志明長女蔡加敏去年底結婚後，火速造人成功，前晚以超大碼、脹爆孕婦look與夫婿馬鴻銘出席父親公司周年晚宴。重了30磅、陀B女的蔡加敏透露以聽音樂會為胎教，早前看過陶喆個唱，B女就不停踢她。
玩具大王蔡志明前晚為旗下旭日國際集團成立35周年，在會展舊翼舉行晚宴慶祝，不少商界好友如大劉劉鑾雄和楊受成均前來捧場，蔡家上下更是總動員出現，蔡志明率領太太李惠莉、次女加怡和孻仔加讚，長女加敏（Carmen）更是傳出懷孕後，首度與夫婿馬鴻銘「一家三口」出席公開場合，場面熱鬧。
黎姿做契媽
去年底出嫁的Carmen，旋即成功造人，早前其胞妹加怡已踢爆她陀B女，前晚Carmen出席父親公司周年晚宴，見她發福了不少，她大談近況說：「都重咗成30磅，BB房用品已準備好晒，都睇咗好多書。至於胎教方面，呢排帶佢去聽演唱會，好似之前去完聽陶喆，之後不停踢我，好犀利，好活躍。」
Carmen續說：「自己仲有返工，因為喺屋企好悶，返到5月就開始待產，到時BB都會擇日擇時辰出世。」在旁的馬鴻銘即說：「其實都唔想佢返工，自己第一次做爹哋，都好緊張，已經買咗架有BB座位嘅房車。」
問有否為未來B女選定契爺契媽，Carmen說：「黎姿已經點頭要做契媽。」問會否計劃三年抱兩，會否產後即修身等問題，她說：「生完先算。」馬鴻銘也說：「好似今日，我都唔畀，但佢都要着3吋高跟鞋，佢太貪靚。」
燕窩湯養胎
此外，蔡志明透露一家都十分期待小生命出生，他說：「自己就唔緊張，順其自然，到時太太會教Carmen湊BB。」蔡太謂：「都會日日煲燕窩清淡湯水，送去公司畀Carmen飲。」
採訪、攝影：JessicaNgan
