噚日港股承接上個禮拜升勢，成交額接近1000億，恒指由上月中低位反彈逾4000點。市場預期這次反彈，港股有機會重上26000點，嘉賓沈振盈建議投資者先行計算，恒指可能一個月內調整至23500點後再上。李錦則指，若港股出現回吐，投資者可考慮趁機揸Call。
沈：沈振盈 李：李錦 孫：孫柏文
沈：恒指底部20500點已確認，喺呢輪反彈升浪，港股會升5500至6000點，現時恒指升逾4000點，穩陣嘅投資者應先行計算。恒指若能回吐至23500點，港股就有力上到26000點。
孫：如果港股喺呢個月真係落番23500點，投資者可以點做？
李：揸Call。絕對同意沈大師嘅睇法，恒指升咗咁多，好大機會回吐至23500點，投資者喺呢個位買Call，值博率相當高，有機會再上25000點。如果投資者揀恒指Call輪，可以買番24000點行使價嘅輪。
孫：A50中國基金（2823）成為最大成交股份，呢排港股升勢同中國有冇關係？
沈：暫時睇唔到港股升同大陸有太大關係，過去兩個禮拜升市，內地股市都係不斷尋底，到上個禮拜四、五先至有見底迹象，所以呢排港股升勢主要受外圍同美國影響。
李：睇番隻A50中國基金最近嘅成交，主要都係機構投資者買盤居多，散戶買貨較少，反映機構投資者覺得大陸股市跌到一個吸引的價位。
專家對話股份一覽
滙豐（005）
昨收報：131.80元 變幅：無升趺%
市盈率（倍）：10.24
港交所（388）
昨收報：152.30元 變幅：+2.56%
市盈率（倍）：26.35
招商中國基金（133）
昨收報：32.00元 變幅：+3.23%
市盈率（倍）：4.89
A50中國基金（2823）
昨收報：18.98元 變幅：+6.27%
市盈率（倍）：-
滙豐翔龍基金（820）
昨收報：9.62元 變幅：+8.95%
市盈率（倍）：-
港鐵有機番30蚊
陳小姐：港鐵（066）近排嘅股價停咗唔郁，點睇呀？
沈：唔郁係相對性嘅，恒指由舊年11月見頂向下跌，但港鐵至今仍然錄得升幅，港鐵喺25.5蚊做咗個幾靚嘅支持，如果有貨喺手，可以繼續持有，相信家陣嘅反彈浪仲未完，股票輪流炒，作為半隻地產股嘅港鐵跑慢咗，但要上番30蚊唔係難事。
孫：點解睇好港鐵？目標價睇幾多？
陳小姐：因為隻港鐵擁有大量土地儲備，算係半隻地產、半隻公用股，相信佢今個月上番30蚊唔難。
李：如果陳小姐相信港鐵有機會一個月內去番30蚊，約有15%升幅，可以考慮揀行使價27、28蚊嘅窩輪，呢啲輕微價外嘅窩輪，一旦破咗行使價，由價外轉做價內，輪價有機會升兩、三倍，但要提醍你唔好揀年期太短嘅窩輪。
