本地富豪新一代逐步接力，除咗學做生意，仲搞慈善組織，建立形象兼人脈關係。不過，搞慈善都有唔同山頭，好似四叔大仔李家傑牽頭嘅百仁基金會，就有最多富豪第二或第三代埋堆；而賭王家族就最撐公益金，一家幾口先後做過公益金董事；至於東華同仁濟，名媛亞太入局嘅多，未定性嘅第二三代就比較少喇！
百仁會：人多勢眾
百仁基金會（簡稱百仁會），創會委員有近50個，可以話係最多富豪之後入會嘅慈善組織，好似李家誠、李國寶兩個仔民橋、民斌，彤叔個孫鄭志剛、吳光正個仔宗權、大劉仔劉鳴煒、霍英東兩個孫啓剛同思緯等，唔計家族嘅資產，淨係以11個執委嘅入會費每位50萬銀，同埋每位會員5萬蚊計，坐底已經有700幾萬銀。
公益金：何家相傳
另一個喺香港有悠久歷史兼社會地位嘅係公益金。公益金幹事或會員，主要係社會知名賢達，名人第二或第三代想入會，除咗要捐得錢多，仲要排隊逐級上，想做董事？更加要有提名先至有得選。不過朝中有人好辦事，好似身為名譽副主席嘅賭王，年年捐錢都入十大，先捧阿女何超瓊做3年董事，阿女屆滿，就由小賭王何猷龍接棒，佢仲拉埋合和（054）胡文新、信和（083）黃永光，同埋東亞李民斌做會員，反正四個私下老友鬼鬼，一齊做埋善事仲實際。