趁清明節假，去咗台灣墾丁4月5日至6日舉行嘅「春天吶喊」音樂會，有300隊band表演，大家喺偌大嘅公園、海灘跳舞，好high（我哋係naturalhigh，冇take嘢，好健康）！嗰度溫度廿幾三十度，為咗同台灣美眉鬥，我哋班女仔都「三點」盡露，我話三點式泳衣呀。
音樂會提供營地，但我哋最後都揀民宿，墾丁好多好靚嘅民宿。外地人預訂台灣民宿，好多時都要滙錢過去台灣。我之前喺網上搵到間，民宿主人叫我經銀行滙錢過去，但當我喺銀行滙錢填上民宿中文名時，櫃枱職員話如果寫中文名，手續費要收貴啲，要250蚊，但如果寫英文名，只需150蚊。我之後問過幾間銀行，結果都一樣。
最後問恒生銀行靚女公關Michelle，佢解釋原來一般電滙，如果收款一方係用英文名，兩地銀行之間可以直接交換資料，但如果用中文名，就要先將中文名轉碼至可以傳送過去，因為轉碼工作由專人負責，所以收費會貴啲。
記住喇，下次滙錢去外地，就算係台灣，都要問對方攞英文名呀！
逢周一至周四刊出