長江後浪推前浪，一代新人勝舊人，喺中信泰富（267）最新年報就最能「體現」呢句說話。睇番份年報，主席榮智健07年薪金連津貼，有321萬銀，加埋4800萬花紅同其他福利，榮少共袋6699萬銀，比06年升咗31%，絕對跑贏通脹。不過，相比起佢06年加咗77%人工嚟講，呢個升幅只係濕濕碎。
至於佢個寶貝仔榮明杰（圖），雖然實際人工冇老竇咁多，但係講到升幅，華華都要學股票分析員嘅口脗講──跑贏大巿！07年佢薪金及津貼有112萬銀，加埋900萬花紅同其他福利，總共𢭃1657萬，比06年嘅838萬，升咗差唔多一倍。
再睇埋佢06年嘅人工，又係以倍數上升，比05年足足多咗2.3倍。人工年年倍數咁加，羨慕佢嘅又點只華華。