北京08奧運聖火將會喺下個月2號傳到香港，到時特首曾蔭權、運動員以及各界代表，合共120位火炬手，將會負責傳送聖火，每人負責傳送200至250米嘅聖火路程。
演藝界嘅代表方面，除咗張學友、陳慧琳、陳奕迅同古巨基外，原來阿姐（汪明荃）同劉德華都有份傳聖火，至於楊千嬅就負責澳門方面嘅聖火傳送。
馮仁昭噚日打電話畀阿姐求證佢係咪有份傳奧運聖火，阿姐有所顧忌咁話：「未知呀！遲吓會有公佈，𠵱家乜都唔講得。」
搶聖火好唔啱
馮仁昭知道火炬手名單要等到今個月底官方先至正式公佈，未公佈前邊個都唔可以向外透露，又難怪一向注重紀律嘅阿姐都唔肯多講。而講到前日奧運聖火喺英國倫敦傳送期間，有示威者埋身搶奪聖火火炬呢件事，阿姐有啲勞氣咁話：「梗係好唔啱啦，運動還運動，唔應該搞啲咁嘅嘢！」不過阿姐話香港治安好好，所以唔會擔心香港有類似事情發生。