大家都怪聯繫滙率搞到港紙俾美金拖累齊齊跌，金管局總裁任志剛都忍唔住，月初喺佢個專欄度話，其實港元滙率每轉弱1%，短期至中期而言，只會導致本地物價上漲介乎0.1至0.2%。網友xtb見到任總咁講，就呼籲啲網友一齊「講畀任總聽通脹嘅原因」。
引嚟網友咁大迴響嘅，係任總講人工係通脹其中一個因素。xtb好嬲咁話：「老任話我哋工資上漲先係元凶，冇病吓嘩！人工加極都唔夠食物、樓價、租金升得快啦，睇睇供樓同租金佔收入比例大過食物幾多？」
藍白紅亦回應一句，「快啲叫佢減人工。」仲話任總人工咁高，實扯高通脹啦！andysss甚至話任總「冇得續約後，講嘢亂嚟」。不過，georgemok就撐任總話：「香港有三百幾萬打工仔，人工升5%，通脹起碼加2%，任總講得好有理。」