候任世界銀行首席經濟師林毅夫到中文大學發表英語演講，左丁山特登走入去聽吓，入到演講廳，有好多猛人噃，李國章、羅范椒芬（takenotes最勤力）、錢果豐、鄭明訓、蒙民偉、吳清輝、梁劉柔芬、陳鉅源等等一一在座，仲有好多大教授、外國領事、大學生等等，林毅夫今日聲價不同，果然吸引力不同凡響。
林毅夫講發展理論，十分詳細，識經濟學者一聽就明，唔識者可能聽都聽唔切，無謂在此重複。當日有大班記者在場，可惜嘅係，次日報導幾乎對林教授演講內容隻字不提，只係講番佢哋發問嘅人民幣滙率，港股直通車，港元滙率等問題，難道記者覺得演講內容太複雜，或者聽唔明？
林毅夫好識答問題。鄭明訓問佢港元會否與美元脫鈎，佢答：「香港有好多權威，我無謂多言。」鄭明訓立刻回應：「你十分政治正確！」錢果豐問：「勞動合同法是否清除污染嘅次佳（secondbest）政策工具？」林毅夫答咗一大輪講勞動合同法如何保障勞工，始終冇正面講到「次佳」、「外部因素」等問題；然後又到李國章問：「林教授講到經濟發展與政府政策、思潮（ideas）有關，但當ideas與publicopinion有衝突時，有如何解決方法？」林教授知道呢條問題係棉裏針，立即講：「我哋經濟學家當自己係傳教士（preacher），周圍講道而已。」果然係高手過招，完全唔上身。李國章素來識得幽默，未問之前已經講咗一句：「我自己唔識經濟學，我聽人講，經濟學係普通常識，以常人不明白之語言表達之！」英文原文好似係economicsisjustcommonsensepresentedinalanguagethatnobodycanunderstand），引起哄堂大笑。
林毅夫即將到世銀上任，一言一語，必受人注目，所以在公眾場合被問及公共政策問題，必定答得小心翼翼，大家無謂苛求。近距離觀察佢，面相非常靚，相學家一定會話佢行鼻運，而且晚運極佳，唔怪得佢會時來風送滕王閣，扶搖直上。有料之人加上運程配合，必發無疑。