我個friendConnie媽最精打細算，就算買嘢畀現金，都用張八達通嚟儲日日賞積分。
前幾日佢去咗銅鑼灣時代廣場對面間麥當勞，用現金畀錢後，醒起要儲分，即刻同個櫃台講，點知個妹妹仔話：「落咗單喎，要儲分又唔早啲講。」Connie媽發揮辣妹本色：「你又唔提我，你哋平時都有提啲客儲分㗎。」點知妹妹仔理直氣壯話：「公司最近規定，唔使再主動提醒啲客㗎喇。」最後喺Connie瞪起對已經好大嘅眼不斷堅持後，個女仔終於幫佢儲分。
麥當勞公關後來解釋，因為有顧客反映，每次都問係咪需要儲分，費時失事，所以減省呢個步驟，若果畀現金嘅顧客要求，都好樂意幫佢哋儲分。
大家以後要記得儲分。不過，既然麥記咁從善如流，不如取消埋其他提示啦，包括「加5蚊可以買多件蘋果批」、「加5毫換大汽水」、「要唔要換公仔」之類，係咪？
逢周一至周四刊出