上個月東亞（023）公佈全年業績，為港股嘅業績高峯期揭開序幕，跟住唔少大藍籌都陸續公佈中期或者年度業績。作為長線投資者，最關注嘅除咗係公司交出啲乜嘢業績，更重要係收到幾多股息，講開收股息，大家估唔估到城中嘅收息王係邊個呢？
冇錯，股息收得最多嘅，就係長實（001）主席李嘉誠，啱啱派完全年成績嘅長實，末期息1.95銀，超人作為長實大股東，淨係收息都已經成18.07億銀，嚿錢多到買架飛機玩吓都仲得！
四叔中期息收逾四億
緊隨超人後面嘅，就係新地（016）郭氏兄弟。雖則郭大哥仲休緊假，三兄弟一齊noshow中期記招，不過新地強調公司運作如常，中期息當然照派。不過單單係中期息嗰0.8蚊，佢哋三個已經淨袋8.7億銀。雖然三個人一齊分，但係賭王何鴻燊都叫佢哋三兄弟要三位一體，就係三兄弟嘅股息一齊計，先至贏到向有股息王之稱嘅世叔伯李兆基咋！
如果跟《福布斯》富豪榜排名，香港第三位應該係四叔李兆基。點知今次畀利豐（494）馮國經撼贏四叔！利豐末期息0.5元，馮國經收息5.75億，啱啱贏咗個馬鼻。
至於收息王李兆基，由於剛剛只係收到中期股息，所以以4.53億銀排第四。小電王米高嘉道理末期息收4.37億，緊隨四叔之後。
不過華華最估唔到嘅，就係彤叔比老友四叔差咁遠，新世界發展（017）中期息0.18蚊，彤叔收息2.43億銀，輸畀小電王同榮智健，同四叔足足輸幾個身位。不過就勁過吳光正同黃廷方家族。
收息最多富豪
富豪：李嘉誠 上市公司：長實
派息（元）：1.95 共收股息（億元）：18.07 中/末期：末
富豪：郭氏兄弟 上市公司：新地
派息（元）：0.8 共收股息（億元）：8.7 中/末期：中
富豪：馮國經 上市公司：利豐
派息（元）：0.5 共收股息（億元）：5.75 中/末期：末
富豪：李兆基 上市公司：恒地
派息（元）：0.4 共收股息（億元）：4.53 中/末期：中
富豪：米高嘉道理 上市公司：中電
派息（元）：0.92 共收股息（億元）：4.37 中/末期：末
富豪：榮智健 上市公司：中信泰富
派息（元）：0.8 共收股息（億元）：4.13 中/末期：末
富豪：鄭裕彤 上市公司：新世界發展
派息（元）：0.18 共收股息（億元）：2.43 中/末期：中
富豪：吳光正 上市公司：會德豐
派息（元）：0.125 共收股息（億元）：1.5 中/末期：末
富豪：黃廷方家族 上市公司：尖沙嘴置業
派息（元）：0.1 共收股息（億元）：1.03 中/末期：中
富豪：邢李㷧 上市公司：思捷環球
派息（元）：0.95 共收股息（億元）：1.01 中/末期：中
電郵：mailto:[email protected]