奧運聖火四年先傳一次，有份做火炬手自然係無上光榮，難怪明明唔係運動健將嘅煲呔都要爭住做第一棒。不過，煲呔就算幾想凸顯佢嘅巴巴閉，至今都唔夠膽親口證實自己係火炬手，只係唔承認又唔否認嗰隻。梗係啦，名單仲要等北京奧組委正式拍板，搶閘大肆宣揚等同洩露國家機密，煲呔呢個醒目仔又點敢吖？
偏偏，就係有人爭住認，忍嘴忍多幾日都做唔到。噚日行會召集人梁振英（CY）喺一個公開場合，被記者問到係咪有份做火炬手，CY即時表現得極度雀躍，話好開心聖火喺香港運送期間，自己會擔任120位火炬手嘅其中一位，不過暫時未知跑邊一段路。CY講時七情上面，似乎冇諗過事先張揚北京奧組委預計29號前公佈嘅名單，可能惹嚟北京不滿。
CY講得興起時仲停唔到嘴，話自己雖然有跑過接力賽，但係始終未試過攞火炬，攞接力棒同火炬嘅姿勢又明顯好唔同，所以嚟緊一段時間都要學好跑步姿勢，完全陶醉於佢自己嘅火炬夢之中。八方估計，佢一定估唔到，其他人對佢「大口」作風可能好睇唔過眼。
霍震霆暗寸多口
好似港協暨奧委會會長霍震霆，盛傳係最後一棒火炬手。但佢噚日出席大埔區迎奧運嘉年華時，同樣被問到係咪擔任火炬手，卻非常識做咁話，知道邊啲說話唔可以出街，所以只係話不予置評，佢仲重申確實嘅火炬手名單，一定要等北京奧組委拍板後先至可以公佈，似乎係暗寸緊一時興起搞到漏晒料嘅CY喎。
小霍噚晚又再飛去北京，同有關方面商討包括火炬手名單在內嘅奧運安排；唐唐又會喺嚟緊嘅星期三訪京，跟進奧運籌備工作，包括港區火炬接力活動安排。由此可見，理論上火炬手名單仍有變數。CY自爆入選，差啲要大鑼大鼓擺幾十圍請飲話畀人知佢有幾威幾勁，咁人哋奧組委都唔好意思最後階段叮走佢啦。不過，阿爺未必鍾意人哋咁多口，近期放晒口風唔排除將來選特首嘅CY，如果真係要成功接煲呔棒，起碼都要學吓煲呔咁口密至得咯。
mailto:[email protected]