自M.BenzC63AMG登陸香港後，坊間有傳話佢搞到BMWM3Coupe亂晒陣腳，仲話有好多人轉投前者懷抱㖭！實情係咪咁我車報員真係唔敢講，但我知道好快會有一場C63AMG同M3嘅角力賽展開！
我都估到你會話唔係一早開始咗啦咩？梗係唔係啦，大家唔好唔記得，前者係四門房跑車，後者係純種雙門跑車喎！講番轉頭，最近收到BMW代理朋友嘅電話，話佢哋好快會引入M3四門同開篷版本。機械配搭唔使多講，大家都知道佢哋用嘅引擎都係嗰台4.0公升V8型號，馬力可以去到420匹，但就有全新配用Double-Clutch技術嘅DKG自動波箱畀你揀，而四門版就唔似Coupe版咁有用CFP物料製造嘅車頂，開篷版則會選用電摺硬頂。至於大家最關心嘅售價，據聞四門版會同對手C63AMG差唔多，賣約109萬，而開篷版則大約係143萬嘅水平，咁呢次仲唔係正面交鋒！
記者：車報員