究竟《長江7號》係一套好片定爛片？問100個人有100種答法！只知道佢係今年香港賀歲片票房冠軍、國內更大收過億票房。本周事先張揚出DVD，銷量僅次於上次《功夫》，出入碟舖差唔多人手一隻。Sales仲笑笑口話，有一半人冇上戲院睇，咪當佢新片買囉！老實，我都係星爺Fans，佢拍乜都會撐，$98即畀！
記者、攝影：朱崇德
齋版無Making無NG
撐得太急，買碟時乜都冇睇！返到屋企先知，竟然係「齋碟版」，甚麼MakingOf、刪剪片段、幕後人員講評完全欠奉，$98真係純買一套戲返嚟！至於聲畫方面，放入電腦一睇，行DVD5，容量為4.19GB；唔知係咪SONYPICTURES關係，同佢嘅Blu-ray機一樣，都一樣係力撐DolbyDigital，「語言」行三條聲軌，分別係普通話、廣東話同泰語嘅DD5.1。
整體聲畫表現，老實講句只可以話僅僅合格，不過套戲擺明玩溫情，炸爆機、大動作場面又冇乜，只作一般消遣娛樂咁睇法，相信嬲佢唔落嘅！不過預設聲效竟然係普通話，小弟天真、無知，直至開畫數分鐘後，星爺開口先發現「賴」嘢，要選去第二條聲軌先變廣東話。
老香港苦故事
至於故事內容方面，大家都係估佢唔到！星爺今次只係一個「大」配角，徐嬌擔正做主角。故事講星爺係一個冇讀過書嘅窮苦民工，某次機緣下拾荒時執到外星寵物「7仔」，愛子徐嬌如獲至實，以為佢會好似叮噹咁多法寶，點知科科考試照攞零雞蛋；後星爺與嬌因讀書及7仔問題爭執，難得嬌肯發憤讀書，但星爺卻在此時發生工業意外……故事整體只可以用平衡嚟形容，取材多是老香港貧民的苦歲月，好似板間房，係床、係飯枱又係書枱，餐餐食隔夜餸；細路仔冇嘢玩，打曱甴都玩一餐！唔怪之得首映當日搵嚟我哋「獅子山下」曾特首做嘉賓座上客。其實取材用心唔錯，可惜太心急亦太多嘢講，觀眾未能投入角色同發生感情，呢啲老「問題」已經排山倒海而至，令溫情感覺大打折扣。
齊料DVD要等6、7月
相信另一個碟迷關心問題，就係幾時有Making齊料版睇？路邊社可靠消息，同上次《功夫》一樣，《長》除今次「齋版」，可望於6、7月再推「齊料版」DVD，相信除聲畫更上一層樓外，跟碟送7仔一類公仔機會都相當高！
至於更加殺到埋身嘅問題，係嚟緊今個月底出嘅Blu-ray版《長》。雖然暫時資料公佈甚少，不過好多碟舖樂觀想法，係Blu-ray碟版造價不菲，應該唔會又玩「齋版」嘞啩?!
